لتا منگیشکر عاطف اسلم کے ریمیک گانے پر بول پڑیں

بھارت کی لیجنڈ گلوکارہ لتا منگیشکر کو پاکستان کے معروف گلوکارعاطف اسلم کا 'چلتے چلتے' گانے کا ریمیک پسند نہ آیا۔

ماضی کی مشہور زمانہ فلم 'پاکیزہ' میں لتا منگیشکر کی آواز میں ریکارڈ ہونے والا گیت 'چلتے چلتے' کو ایک بار پھر بالی ووڈ کی نئی فلم 'مترون' میں عاطف اسلم کی آواز میں شامل کیا گیا جوچند دنوں میں ہی مقبول ترین گیت بن گیا جب کہ گانے کے ریمیکس ورژن کو ملنے والی شہرت کا اندازہ اس بات سے لگایا جا سکتا ہے کہ اب تک اس گانے کی ویڈیو کو 79 لاکھ سے زائد افراد دیکھ چکے ہیں تاہم لتا منگیشکر کو عاطف اسلم کا یہ گیت ایک نظر نہیں بھایا۔

https://www.youtube.com/watch?v=WOCCPqFeReE


بھارتی میڈیا رپورٹس کے مطابق بھارت کی لیجنڈ گلوکارہ لتا منگیشکر نے ناراضگی کا اظہار کرتے ہوئے کہا کہ عاطف اسلم کے گانے کو میں نے نہیں سنا اور میں سننا بھی نہیں چاہتی کیوں کہ پرانے گانے کو ریمیکس کرنے کا رجحان مجھے افسردہ کردیتا ہے۔

https://www.youtube.com/watch?v=flQb8zW7CrM

لتا منگیشکر کا کہنا تھا کہ کیا محنت کی کوئی قیمت نہیں؟ کیا ماضی کے ایسے بہترین گانوں سے محبت نہیں جب کہ میں نے یہ بھی سنا ہے کہ گانے کے بول بھی تبدیل کردیے گئے ہیں لیکن اس کی اجازت کس سے لی گئی؟ انہوں نے کہا کہ گانے کے اصل شاعر اور موسیقار نے اسے تیار کیا لیکن کسی کو اجازت نہیں کہ موسیقاروں اور بول کی تخلیق تبدیل کرے'۔