مقبوضہ کشمیر میں مسافر بس گہری کھائی میں گرنے سے 11 افراد ہلاک

ویب ڈیسک  ہفتہ 8 دسمبر 2018
بس موڑ کھاتے ہوئے گہری کھائی میں جاگری۔ فوٹو : اے این آئی

بس موڑ کھاتے ہوئے گہری کھائی میں جاگری۔ فوٹو : اے این آئی

 سری نگر: مقبوضہ کشمیر میں مسافر بس کے گہری کھائی میں گرنے کے باعث 11 افراد ہلاک اور 19 زخمی ہوگئے ہیں۔

بین الاقوامی خبر رساں ادارے کے مطابق مقبوضہ کشمیر کے ضلع لوراں سے پونچھ آنے والی بس ڈرائیور سے بے قابو ہو کر 100 میٹر گہری کھائی میں گر گئی جس کے نتیجے میں 11 افراد ہلاک اور 19 زخمی ہوگئے۔

ریسکیو اداروں نے امدادی کاموں کا آغاز کرتے ہوئے بس میں پھنسے مسافروں کو باہر نکالا، ہلاک اور زخمی ہونے والوں کو قریبی اسپتال منتقل کردیا گیا ہے جہاں 5 زخمیوں کی حالت نازک ہونے کے باعث ہلاکتوں میں اضافے کے خدشے کا اظہار کیا جا رہا ہے۔

پولیس کا کہنا ہے کہ حادثہ تیز رفتاری کی وجہ سے پیش آیا، ڈرائیور نے ایک خطرناک موڑ پر بھی بس کی رفتار کو کم نہیں کیا جس کے باعث مسافر بس بے قابو ہو کر کھائی میں گر گئی۔

عینی شاہدین کا کہنا ہے کہ ریسکیو ٹیم اور پولیس کے تاخیر سے پہنچنے کے باعث ہلاکتوں میں اضافہ ہوا جب کہ حادثہ ڈرائیور کی غفلت اور لاپرواہی کی وجہ سے پیش آیا۔ کھائی گہری ہونے کی وجہ سے بھی ریسکیو کاموں میں مشکلات کا سامنا ہے۔



ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔