کتوں کو بچانے کی کوشش میں 3 خواتین سیلابی ریلے میں بہہ کر ہلاک

یورپی ملک سلوواکیہ میں جانوروں کے تحفظ گھر میں سیلابی ریلا داخل ہوگیا اور کتے سیلابی ریلے کے ساتھ بہنے لگے جس پر شیلٹر ہاؤس کی 3 خاتون اہلکاروں نے اپنی جان کی بازی ہار کر کتوں کو بچالیا۔

بین الاقوامی خبر رساں ادارے کے مطابق یورپی ملک سلوواکیہ میں شدید بارشوں کے باعث پانی کی سطح بلند ہونے پر ڈیم ٹوٹ گیا اور پانی سیلابی ریلے کی صورت شہری علاقے میں داخل ہوگیا۔


دارالحکومت کے قریبی علاقے میں جانوروں کے شیلٹر ہاؤس میں ہنگامی حالت کا اعلان کردیا گیا جس پر قریبی واقع ایک اور شیلٹر ہاؤس کی 3 خاتون اہلکاروں نے کتوں کو اپنی گاڑی میں رکھا اور سیلابی ریلے سے ہوتے ہوئے محفوظ مقام پر منتقل کیا۔

خواتین کتوں کو ریسکیکو کرنے کے بعد سیلابی ریلے میں گھرے شیلٹر ہاؤس کے مزید جانوروں کو نکالنے کیلیے پلٹیں لیکن راستے میں سیلابی ریلے میں بہہ گئیں۔ ایک خاتون کی لاش قریبی علاقے سے گاڑی میں مل گئی ہے بقیہ کی تلاش جاری ہے۔

وزیراعظم سلوواکیہ نے کتوں کی جان بچانے کے دوران اپنی زندگی کی جنگ ہارنے والی خاتوں اہلکاروں کی یاد میں آج 'قومی یوم سوگ' کا اعلان کیا ہے۔ سیلابی ریلے سے متاثرہ علاقے میں ایمرجنسی نافذ ہے۔