چودھری پرویزالٰہی سے خواجہ سعد رفیق اور سلمان رفیق کی ملاقات

مسلم لیگ (ن) کے سینئر رہنما خواجہ سعد رفیق اور خواجہ سلمان رفیق نے ملاقات کی اور باہمی دلچسپی کے امور پر تبالہ خیال کیا۔

اسپیکر پنجاب اسمبلی چودھری پرویزالٰہی سے ن لیگ کے سینئر رہنما ایم این اے خواجہ سعد رفیق اور ایم پی اے خواجہ سلمان رفیق نے ان کی رہائش گاہ پر ملاقات کی۔ اس موقع پر سیکرٹری پنجاب اسمبلی محمد خان بھٹی بھی موجود تھے۔


خواجہ برادران نے سابق وزیراعظم چودھری شجاعت حسین کی خیریت دریافت کی اور ان کیلئے نیک تمناؤں کا اظہار کیا۔

چودھری پرویزالٰہی نے کہا کہ کورونا جیسے موذی مرض سے نمٹنے کیلئے سیاست کو ایک طرف رکھ کر ہم سب نے بحیثیت قوم مل کر اس کا مقابلہ کرنا ہے، آج انسانیت تقاضا کرتی ہے کہ ہم سب مل کر یکجہتی کا مظاہرہ کریں۔

خواجہ سعد رفیق نے کہا کہ چودھری خاندان سے ہمارا پرانا تعلق ہے، ہمارے بزرگ، چودھری صاحبان اور ان کے بزرگوں کا آپس میں بڑا گہرا تعلق تھا، اس دیرینہ تعلق کو ہم آگے لے کر چلنا چاہتے ہیں۔