نورمقدم کیس بادی النظر میں تھراپی ورکس کے مالک اور ملازم قتل میں شریک نہیںعدالت

عدالت نے نور مقدم کیس میں کہا ہے کہ بادی النظر میں تھراپی ورکس کے مالک اور ملازم قتل میں شریک نہیں۔

اسلام آباد کے ایڈیشنل سیشن جج عطا ربانی نے نور مقدم کیس میں تھراپی ورکس کے مالک اور ملازمین کی ضمانت پر رہائی کا تحریری فیصلہ جاری کردیا، 3 صفحات پر مشتمل تحریری فیصلے میں ملزمان کی ضمانت منظور کرنے کی وجوہات بیان کی گئی ہیں۔


فیصلے میں کہا گیا ہے کہ قتل کے وقت تھراپی ورکس کے مالک یا ملازمین موقع پر موجود نہیں تھے، ریکارڈ کے مطابق مرکزی ملزم ظاہر جعفر نے تھراپی ورکس کے ملازم امجد کو بری طرح زخمی کیا،بادی النظر میں تھراپی ورکس کے مالک اور ملازمین نور مقدم کے قتل میں شریک نہیں۔ ایسے حالات میں گرفتار ملزمان کو لامحدود وقت کے لیے جیل میں رکھنے سے پراسیکیوشن کو کوئی فائدہ نہیں ہو گا۔

عدالتی فیصلے میں مزید کہا گیا ہے کہ اس موقع پر یہ مفروضہ قائم نہیں کیا جا سکتا کہ تھراپی ورکس کی ٹیم ثبوت مٹانے گئی تھی، ملزمان کے ثبوت مٹانے یا شواہد ضائع کرنے کا معاملہ ٹرائل کے دوران طے ہو گا، موقع پر پہنچنے سے پہلے تھراپی ورکس کی ٹیم کو قتل کا علم تھا یا نہیں، یہ بھی دوران ٹرائل طے ہو گا۔

واضح رہے کہ نور مقدم کیس میں تھراپی ورکس کے مالک اور ملازمین کی ضمانت گزشتہ روز منظور کی گئی تھی۔