سپریم کورٹ فیصلے کے بعد خیبرپختون خوا بلدیاتی انتخابات کے دوسرے مرحلے کا نیا شیڈول جاری

لاہور:
سپریم کورٹ نے خیبر پختونخوا میں بلدیاتی انتخابات کا دوسرا مرحلہ موخر کرنے کا پشاور ہائیکورٹ کا حکم معطل کردیا، جس کے بعد الیکشن کمیشن آف پاکستان نے شیڈول جاری کردیا۔

جسٹس اعجازالاحسن اور جسٹس عائشہ ملک پر مشتمل سپریم کورٹ کے دو رکنی بنچ نے کے پی میں بلدیاتی انتخابات کا دوسرا مرحلہ موخر کرنے کے پشاور ہائیکورٹ کے فیصلے کے خلاف درخواست کی سماعت کی۔ سپریم کورٹ نے ہائیکورٹ کا فیصلہ معطل کرتے ہوئے فریقین کو نوٹسز جاری کر دیے۔

الیکشن کمیشن کے وکیل نے کہا کہ پشاور ہائیکورٹ ایبٹ آباد بنچ نے الیکشن کمیشن کو سنے بغیر بلدیاتی انتخابات کا شیڈول موخر کر دیا، یکم فروری کی سماعت کا نوٹس دو فروری کو موصول ہوا، جو ملنے تک ہائیکورٹ بلدیاتی انتخابات موخر کر چکی تھی، ہائی کورٹ میں پانچ اضلاع کا الیکشن موخر کرنے کی درخواست دائر کی گئی تھی جس پر 18 اضلاع کا الیکشن موخر کر دیا گیا۔

شکایت کنندگان کے وکیل نے کہا کہ موسمی حالات کے پیش نظر 27 مارچ کو انتخابات نہیں ہو سکتے۔

یہ بھی پڑھیں: بلدیاتی انتخابات کے دوسرے مرحلے پر خیبر پختونخوا حکومت اور الیکشن کمیشن میں تنازعہ


جسٹس عائشہ ملک نے ریمارکس دیے کہ ہائیکورٹ کو فیصلے سے پہلے الیکشن کمیشن کا موقف سننا چاہیے تھا، اس بات کی تصدیق نہیں ہوئی کہ کے پی میں موسمی حالات الیکشن میں رکاوٹ ڈال سکتے ہیں۔

جسٹس اعجاز الاحسن نے کہا کہ محکمہ موسمیات کی رپورٹ کو الیکشن کمیشن نے دیکھنا تھا عدالت نے نہیں، ہائیکورٹ کو فیصلہ دینے کی اتنی جلدی کیا تھی؟ عدالت نے کیسں کی سماعت پیر 14 فروری تک ملتوی کردی۔

الیکشن کمیشن شیڈول

الیکشن کمیشن نے خیبرپختونخوابلدیاتی انتخابات کے دوسرے مرحلے کا نیا شیڈول جاری کر دیا، جس کے بعد بلدیاتی انتخابات کے دوسرے مرحلے کی پولنگ31 مارچ کو ہوگی، امیدواران کے کاغذات نامزدگی چودہ فروری سے اٹھارہ فروری تک جمع کرائے جا سکیں گے۔ واضح رہے کہ سپریم کورٹ کے فیصلے سے قبل خیبرپختونخوا بلدیاتی انتخابات کے دوسرے مرحلے کی پولنگ پہلے ستائیس مارچ کو ہونا تھی۔