پشاور زلمی نے اسلام آباد یونائیٹڈ کو 10 رنز سے شکست دے دی

کراچی:
پاکستان سپرلیگ سیزن 7 کے 24ویں میچ میں پشاور زلمی نے جیت کے لیے 207 رنز کا ہدف دیا تو اسلام آباد یونائیٹڈ کی ٹیم تعاقب میں ناکام رہی اور مقررہ اوورز میں 196 رنز ہی بناسکی۔

لاہور کے قذافی اسٹیڈیم میں ایچ بی ایل پی ایس ایل کا 24واں میچ پشاور زلمی اور لاہور قلندرز کی ٹیموں کے درمیان کھیلا گیا، جس کا ٹاس وہاب الیون کے حق میں رہا۔

زلمی کے کپتان وہاب ریاض نے ٹاس جیت کر پہلے بیٹنگ کا اعلان کیا اور بتایا کہ آج پلیئنگ الیون میں ایک تبدیلی کی گئی، محمد عمر کی جگہ یاسر خان کو اسکواڈ میں شامل کیا گیا۔

پشاور زلمی اننگز

پشاور زلمی کی جانب سے بیٹنگ کا آغاز حضرت اللہ زازئی اور محمد حارث نے کیا، دونوں بلے بازوں نے یونائیٹڈ کے بولرز کی خوب پٹائی کی، اس دوران محمد حارث نے 18 گیندوں پر 4 چھکوں اور 6 چوکوں کی مدد سے 50 رنز کر پی ایس ایل کی تیز ترین نصف سنچری اسکور کرنے کا اعزاز اپنے نام کیا۔

پھر 73 کے مجموعی اسکور پر حضرت اللہ زازئی 13 رنز بنا کر آؤٹ ہوئے، پشاور زلمی کی دوسری وکٹ 113 رنز پر گری جب محمد حارث 32 گیندوں پر 5 چھکوں اور 7 چوکوں کی مدد سے 70 رنز کی شاندار اننگز کھیل کر آؤٹ ہوئے۔

پشاور زلمی کی تیسری وکٹ 135 رنز پر اُس وقت گری جب یاسر خان 35 رنز بنا کر آوٹ ہوئے جبکہ 165 کے مجموعی اسکور پر شرفین ردرفورڈ 16 رنز بنا کر آوٹ ہوئے۔ بعد ازاں لیام لیونگسٹن 9 رنز بنا کر آوٹ ہوئے، پھر پشاور زلمی کی چھٹی وکٹ 192 رنز پر اُس وقت گری جب شعیب ملک 38 رنز بنا کر آؤٹ ہوئے، بین کٹنگ بغیر کوئی رن بنائے 194 پر پویلین لوٹے۔

پشاور زلمی نے مقررہ 20 اوورز میں 8 وکٹوں کے نقصان پر 206 رنز بنائے، محمد حارث 70 رنز بنا کر ٹاپ اسکورر رہے جبکہ شعیب ملک 38 اور یاسر خان 35 رنز بنانے میں کامیاب ہوئے۔ اسلام آباد یونائیٹڈ کےفہیم اشرف تین، وقاص مقصود نے دو وکٹیں حاصل کیں۔

اسلام آباد یونائیٹڈ اننگز

اسلام آباد یونائیٹڈ نے 207 رنز ہدف کے تعاقب میں بیٹنگ کا آغاز کیا تو اوپنر رحمان اللہ گرباز 54 کے مجموعی اسکور پر 46 رنز بنا کر آؤٹ ہوئے، نئے آنے والے کھلاڑی دانش عزیز بغیر کھاتہ کھولے ہی 55 کے مجموعی اسکور پر پویلین روانہ ہوئے، انہیں وہاب ریاض نے آؤٹ کر کے پی ایس ایل میں اپنی 100 وکٹیں مکمل کیں۔

اس کے بعد مبشر خان 89 کے مجموعی اسکور پر 21 رنز بنا کر آؤٹ ہوئے پھر لیام ڈاسن 4 رنز کے انفرادی جبکہ 131 کے مجموعی اسکور پر پویلین روانہ ہوئے، دوسرے اینڈ پر اعظم خان نے جارحانہ بلے بازی کرتے ہوئے اپنی نصف سنچری مکمل کی جبکہ آصف علی 11 رنز بنا کر 158 کے مجموعی اسکور پر پویلین لوٹ گئے، پھر فہیم اشرف 9 رنز بنا کر 182 کے مجموعی اسکور پر پویلین لوٹے۔

اٹھارویں اوور کے اختتام تک ایسا محسوس ہورہا تھا کہ اسلام آباد کی ٹیم ہدف حاصل کرلے گی کیونکہ اعظم خان کریز پر موجود تھے مگر انیسویں اوور کی پہلی گیند پر اعظم خان 45 گیندوں پر 7 چھکوں اور 6 چوکوں کی مدد سے 85 رنز کی اننگز کھیل کر 183 کے مجموعے پر آؤٹ ہوئے۔

اعظم خان کے بعد یونائیٹڈ کی ٹیم کا جذبہ ختم ہوا اور پھر نئے آنے والے بلے باز مجموعی اسکور پر صرف 13 رنز ہی بڑھا سکے۔ اسلام آباد یونائیٹڈ کی ٹیم 207 رنز ہدف کے تعاقب میں 20 اوورز میں 7 وکٹوں کے نقصان پر 196 رنز اسکور کرسکی۔

اسلام آباد یونائیٹڈ کے اعظم خان 84 رنز کے ساتھ نمایاں بلے باز رہے جبکہ رحمت اللہ گر باز 46 کے ساتھ دوسرے نمبر پر رہے۔ پشاور زلمی کے سلمان ارشاد نے تین ، وہاب ریاض نے دو جبکہ حسین طلعت اور بین کٹنگ نے ایک ایک وکٹ حاصل کی۔

اسلام آباد یونائیٹڈ کے کپتان نے بتایا کہ شاداب خان اور ذیشان انجری کے باعث پلیئنگ الیون کا حصہ نہیں ہیں، یونائیٹڈ نے آج ٹیم میں پانچ تبدیلیاں کی ہیں۔