’ائرپورٹ عملے سے بدتمیزی نہ کریں‘ سونو سود کی تاخیری پروازوں پر مسافروں سے درخواست

بھارتی اداکار سونو سود نے سردیوں کے باعث پروازوں میں تاخیر پر مسافروں کو تحمل اور برداشت کا مشورہ دیا ہے۔

اداکار نے سماجی رابطے کی ویب سائٹ ایکس پر ایک تصویر شیئر کی ہے جس میں دیکھا جاسکتا ہے کہ ائرپورٹ پر سیکڑوں مسافر اپنی پرواز کا انتظار کررہے ہیں۔

سونو سود نے لوگوں پر زور دیا کہ وہ ائرلائن کے عملے پر غصہ اور بدتمیزی کرنے کے بجائے ان سے تعاون کریں اور تحمل سے پیش آئیں۔

اداکار نے ایکس پر لکھا کہ موسم انسانی اختیار سے باہر کی شے ہے اور وہ خود ائرپورٹ پر تین گھنٹے سے پرواز کے منتظر ہیں۔

انہوں نے لکھا کہ ائرپورٹ کے عملے کے ساتھ نرمی کا برتاؤ ہر کسی کیلئے ممکن نہیں لیکن عملہ بہترین کام کررہا ہے۔

سونو سود کا کہنا تھا کہ انہوں نے متعدد لوگوں کو عملے سے بدتمیزی کرتے دیکھا لیکن ہم سب کو صورتحال کو سمجھنا چاہئے۔