پاکستان مخالف بھارتی فلم فائٹر کی ریلیز متحدہ عرب امارات میں روک دی گئی

بالی ووڈ اسٹار ہریتھک روشن اور دیپیکا پڈوکون کی پاکستان مخالف فلم 'فائٹر' کی ریلیز متحدہ عرب امارات میں روک دی گئی۔

گزشتہ روز یہ خبر سامنے آئی تھی کہ تمام خلیجی ممالک نے پاکستان کے خلاف بنائی جانے والی بالی ووڈ فلم 'فائٹر' کی ریلیز پر پابندی عائد کردی ہے اور صرف محتدہ عرب امارات نے فلم کی ریلیز کی اجازت دی ہے۔

اس بُری خبر سے فلم کے ہدایتکار، پروڈیوسرز، اداکار ہریتھک روشن اور دیپیکا پڈوکون کو بڑا دھچکا لگا تھا، اب آج فلم کی ریلیز کے دن ایک اور بُری خبر سامنے آگئی ہے۔

رپورٹ میں بتایا گیا کہ خلیجی ممالک میں پابندی کے بعد، اب متحدہ عرب امارات میں بھی فلم 'فائٹر' کی ریلیز کو روک دیا گیا لیکن اس کی وجہ تاحال سامنے نہیں آسکی۔

واضح رہے کہ سدھارتھ آنند کی ہدایتکاری میں بننے والی اس فلم میں ہریتھک روشن اور دیپیکا پڈوکون انڈین فضائیہ کے اسکواڈرن لیڈر کا کردار ادا کررہے ہیں جبکہ انیل کپور کمانڈنگ آفیسر کے روپ میں نظر آئیں گے۔

فلم میں حقائق کو توڑ موڑ کر سامعین کے سامنے پیش کیا گیا ہے، فلم میں دکھایا گیا ہے کہ پلوامہ حملے کے بعد انڈین فضائیہ پاکستان کے خلاف ایک آپریشن کا منصوبہ بناتی ہے۔

مزید پڑھیں: ہریتھک روشن کی پاکستان مخالف فلم 'فائٹر' پر خلیجی ممالک میں پابندی عائد

پاکستان کے خلاف بنائی گئی اس فلم کا ٹریلر دیکھ کر پاکستانی عوام اور شوبز شخصیات غصے سے آگ بگولا ہوگئے تھے، سوشل میڈیا کے مختلف پلیٹ فارمز پر بھارتی فلم انڈسٹری، ہریتھک روشن اور دیپیکا پڈوکون پر شدید تنقید بھی کی گئی۔