علی محمد خان کی وزیر اطلاعات کو اپنے ساتھ شہداء کے گھروں میں لے جانے کی پیشکش

علی محمد خان نے وزیر اطلاعات کو اپنے ساتھ شہیدوں کے گھروں میں لے جانے کی پیشکش کردی۔

قومی اسمبلی میں اظہار خیال کرتے ہوئے پی ٹی آئی رہنما علی محمد خان نے کہا کہ آپ ہمارے ساتھ ایبٹ آباد اور دیگر جگہوں پر چلیں میں آپ کیساتھ رینجرز شہدا کے مزارات پر جاؤنگا، ہم کسی سے مذاکرات کی بھیک نہیں مانگیں گے، ہم ڈی چوک کے شہدا کا انصاف چاہتے ہیں۔

علی محمد خان نے کہا کہ خواجہ آصف کہتے ہیں کہ جوانمردی سے جیل کاٹنی چاہیئے، میں نے 78 روز جوانمردی سے جیل کاٹی، ممتاز قادری اور صوفی محمد والی کوٹھڑی میں وقت گزارا، ہم وہ بدقسمت قوم ہیں کہ آج تک ہوش کے ناخن نہیں لیے، ایک وزیر اعظم کو شہید کیا گیا دوسرا پانچ سو دنوں سے قید میں ہے۔

انہوں نے کہا کہ سیاستدان بات کرتا ہے گولی نہیں مارتا، پاکستان ایک سیاستدان نے بغیر بندوق کے حاصل کیا تھا، خان غفار خان اور ولی خان کو عزت دیتا ہوں، ہمیں سلیکٹڈ کہا گیا لیکن ہمارے ہاتھوں پر کسی کا خون نہیں، ایک دن بانی چیئرمین پی ٹی آئی بھی جیل سے نکل آئے گا، آپ نے مجھ پر غداری اور دہشت گردی کا مقدمہ قائم کیا۔