تمام معاملات میں مشاورت ہماری ترجیح ہے پی پی سے بجٹ پر بات چیت جاری رہے گی، وزیراعظم

وزیرِاعظم شہباز شریف نے کہا ہے کہ ہم تمام معاملات میں مشاورت کو ترجیح دیتے ہیں، پیپلز پارٹی نے بجٹ کے لیے تجاویز دے دیں، حکومت کی تشکیل کردہ کمیٹی پیپلز پارٹی کے ساتھ مشاورت جاری رکھے گی۔

ایکسپریس نیوز کے مطابق وزیراعظم شہباز شریف سے چیئرمین پیپلز پارٹی بلاول بھٹو زرداری کی زیر قیادت پیپلز پارٹی کے وفد نے ملاقات کی۔ وفد میں راجہ پرویز اشرف، نوید قمر، گورنر کے پی فیصل کریم کنڈی، وزیراعلیٰ سندھ مراد علی شاہ، وزیر اعلیٰ بلوچستان سرفراز بگٹی اور سینیٹر سلیم مانڈوی والا شامل تھے۔

وزہر اعظم نے کہا کہ پاکستان کی بہادر افواج دشمن کے خلاف ہر دم تیار ہیں بھارت کی جانب سے کسی بھی جارحیت کے خلاف پوری قوم سیسہ پلائی دیوار کی مانند پاک افواج کے ساتھ کھڑی ہے، پاکستان خطے میں امن اور استحکام چاہتا ہے لیکن اپنے دفاع کی حفاظت کے حوالے سے منہ توڑ جواب دینے کی صلاحیت رکھتا ہے پہلگام واقعے کے بعد سے بھارت کا اشتعال انگیز رویہ انتہائی افسوسناک ہے۔

وزیراعظم  نے کہا کہ پاکستان نے نا صرف پہلگام واقعے پر تشویش کا اظہار کیا ہے بلکہ واقعے کی غیر جانب دارانہ اور آزادانہ تحقیقات کا بھی کہا ہے، بغیر کسی ثبوت کے پاکستان کو واقعے سے جوڑنے کی بھارتی کوششوں کو  واضح طور پر مسترد کرتے ہیں۔

انہوں نے کہا کہ بھارت کی جانب سے سندھ طاس معاہدے کو غیرقانونی طور معطل کرنے اور اسے آبی جارحیت کے طور پر استعمال کرنا ناقابل قبول ہے، کیونکہ پانی پاکستانی عوام کے لیے ریڈ لائن کی حیثیت رکھتا ہے۔

وزیراعظم کا کہنا تھا کہ بھارتی جارحیت بے نقاب کرنے کے حوالے سے پاکستان بھرپور سفارتی کوششیں کر رہا ہے اور دنیا کو پاکستان کے نقطہ نظر سے آگاہ کرنے کے لئے میری کئی ممالک کے سفیروں سے ملاقات ہوئی ہے پاکستان اقوام متحدہ کی سیکورٹی  کونسل میں بھی اس مسئلہ کو بھرپور طور پر اٹھائے گا، تاکہ دنیا کو بھارت کا مکروہ چہرہ دکھائے اور اس کے عزائم سے آگاہ کرے۔

شہباز شریف نے کہا کہ پاکستان پیپلز پارٹی سمیت ملک کی تمام سیاسی جماعتیں پاکستان کے دفاع اور حفاظت کے حوالے سے متحد ہیں، پاکستان کے دفاع کی خاطر ہم پاکستان کی بہادر افواج کے شانہ بشانہ کھڑے ہیں۔

وفد نے بھارتی جنگی عزائم دنیا کے سامنے رکھنے پر وفاقی حکومت کی سفارتی کوششوں کی تعریف کی۔

وزیراعظم نے کہا کہ حکومت نے سب سے بڑی اتحادی جماعت کے ساتھ وفاقی بجٹ پر مشاورت کا آغاز کردیا ہے، ہم تمام معاملات میں مشاورت کو ترجیح دیتے ہیں۔

پیپلز پارٹی کے وفد نے وفاقی بجٹ برائے مالی سال 2025-2026 کے حوالے سے تجاویز دیں، یہ بجٹ پر مشاورت کا پہلا دور تھا۔ پیپلز پارٹی کے وفد نے حکومت کی توانائی کے شعبے میں اصلاحات پر مکمل اعتماد کا اظہار کیا۔