میرپور ماتھیلو؛ مال گاڑی کو حادثہ، مسافر ٹرینیں کئی گھنٹے تاخیر کا شکار
میرپور ماتھیلو کے قریب مال گاڑی کا انجن اور 4 بوگیاں پٹڑی سے اتر گئیں، جس کے باعث اَپ اور ڈاؤن دونوں ٹریک عارضی طور پر بلاک ہوگئے۔
تفصیلات کے مطابق ریلوے انجینئرنگ اور آپریشن اسٹاف نے فوری کارروائی کرتے ہوئے اَپ لائن کو بحال کر دیا ہے، جس کے بعد مسافر ٹرین 41 اَپ قراقرم ایکسپریس کو لوپ لائن کے ذریعے روانہ کر دیا گیا۔
روہڑی سے ریلیف ٹرین حادثے کے مقام پر پہنچ گئی اور ڈاؤن ٹریک کی مکمل بحالی پر کام شروع کر دیا۔
ریلوے کی جانب سے ریفنڈ کے لیے اضافی کاؤنٹرز قائم کر دیے گئے ہیں تاکہ متاثرہ مسافروں کو فوری سہولت فراہم کی جا سکے۔
واضح رہے کہ مسافر اور مال بردار ٹرینوں کے آئے روز حادثات کے باعث ریلوے مسافر انتہائی پریشانی کا شکار ہیں جبکہ حادثات کے باعث ریلوے کو کروڑوں روپے نقصان کا سامنا کرنا پڑتا ہے۔