پولینڈ کی ٹینس اسٹار ایگا سوائیٹک نے پہلی بار ومبلڈن کا ٹائٹل جیت لیا

پولینڈ کی ٹینس اسٹار ایگا سوائیٹک نے پہلی بار ومبلڈن کا ٹائٹل اپنے نام کرلیا۔

ایگا سوائیٹک نے امریکی حریف امانڈا اینیسی مووا کو خواتین کے سنگلز فائنل میں بدترین شکست دے کر 2025 ومبلڈن چیمپئن شپ کا ٹائٹل اپنے نام کیا۔

آٹھویں سیڈڈ ایگا سوائیٹک نے 13ویں نمبر کی کھلاڑی اینیسی مووا کو صرف 57 منٹ میں 6-0، 6-0 سے مات دے کر اپنی پہلی ومبلڈن اور مجموعی طور پر چھٹی گرینڈ سلم ٹرافی جیت لی۔

اس سے قبل جرمنی کی لیجنڈ اسٹفی گراف نے 1988 فرنچ اوپن میں نتاشا زویریوا کو اسی اسکور سے شکست دی تھی۔ ومبلڈن میں ایسا نتیجہ آخری بار 1911 میں دیکھنے میں آیا تھا۔

23 سالہ امانڈا اینیسی مووا اپنے کیریئر کے پہلے گرینڈ سلم فائنل میں شریک ہوئیں، لیکن وہ دباؤ میں نظر آئیں۔ میچ کے دوران انہوں نے پانچ ڈبل فالٹس کیے، صرف آٹھ ونرز لگائے جبکہ 28 غیر ضروری غلطیاں کیں۔

سوائیٹک اب تینوں سطحوں (clay, hard, grass) پر گرینڈ سلم جیتنے والی کھلاڑی بن گئی ہیں — وہ پہلے ہی چار مرتبہ فرنچ اوپن (2020، 2022، 2023، 2024) اور ایک بار یو ایس اوپن (2022) جیت چکی ہیں۔

اگرچہ اینیسی مووا کو شکست ہوئی لیکن انہوں نے سیمی فائنل میں ورلڈ نمبر 1 آریانا سبالینکا کو ہرا کر سب کو حیران کیا۔ ان کی شاندار کارکردگی کی بدولت وہ پیر کے روز پہلی بار عالمی ٹاپ 10 میں شامل ہو جائیں گی۔

یہ ایگا سوائیٹک کے کیریئر کی 100ویں گرینڈ سلم فتح تھی۔ وہ اب 100 کامیابیوں اور 20 ناکامیوں کے ساتھ 2019 سے گرینڈ سلم میں مسلسل آگے بڑھ رہی ہیں۔

قابل ذکر بات یہ بھی ہے کہ 2016 میں سرینا ولیمز کے بعد سے یہ آٹھواں موقع ہے کہ ومبلڈن میں کوئی نئی چیمپئن بنی ہو۔