نابینا خاتون کی خودسوزی کی کوشش؛ سیف سٹی آفیسر نے کس طرح جان بچائی؟

فیصل آباد میں ایک نابینا خاتون کی جان ورچوئل ویمن پولیس اسٹیشن کی بروقت اور ہمدردانہ کارروائی کے باعث بچا لی گئی۔

ترجمان سیف سٹی کے مطابق خاتون نے گھریلو مسائل سے تنگ آ کر 15 پر کال کی اور خودسوزی کی خواہش کا اظہار کیا، تاہم وہ ذہنی دباؤ کے باعث اپنا نام یا پتا بتانے سے قاصر تھی۔

صورتحال کی نزاکت کو سمجھتے ہوئے ورچوئل ویمن پولیس اسٹیشن نے نہایت مہارت، تحمل اور ہمدردی کا مظاہرہ کیا اور خاتون کو بات چیت کے ذریعے خودکشی سے باز رکھا۔ سیف سٹی آفیسر نے انتہائی احتیاط کے ساتھ ضروری معلومات حاصل کیں اور فوری طور پر متعلقہ پولیس کو جائے وقوع پر روانہ کر دیا۔

ترجمان سیف سٹی کا کہنا ہے کہ پاکستان کا پہلا ورچوئل ویمن پولیس اسٹیشن اب تک 5 لاکھ سے زائد کیسز میں بروقت معاونت فراہم کر چکا ہے۔ شہریوں، بالخصوص خواتین کو پیغام دیا گیا ہے کہ کسی بھی پریشانی یا خطرے کی صورت میں فوری طور پر 15 پر کال کریں اور 2 دباکر ورچوئل ویمن پولیس اسٹیشن سے رابطہ کریں تاکہ بروقت اور محفوظ مدد حاصل کی جا سکے۔