عدالتی کارکردگی، کیس مینجمنٹ کے مطالعے کیلئے سپریم کورٹ کی ٹیم کا دورہ ترکیہ

سپریم کورٹ کی ٹیکنیکل ٹیم عدالتی کارکردگی، کیس منیجمنٹ کے مطالعے کے لیے ایک ہفتے کے سرکاری دورے پر ترکیہ روانہ ہوگئی۔

سپریم کورٹ سے جاری اعلامیے کے مطابق سپریم کورٹ کی ٹیکنیکل ٹیم ترکیے کے سرکاری دورے پر روانہ ہوگئی ہے، وفد آئینی عدالت ترکیے کے ایک ہفتے کے دورے پر انقرہ پہنچ گیا۔

اعلامیے میں کہا گیا کہ دورہ چیف جسٹس پاکستان جسٹس یحییٰ آفریدی کے عوام دوست عدالتی وژن کا حصہ ہے اور مذکورہ وفد میں سپریم کورٹ، ایف جے اے اور لا کمیشن کے افسران شامل ہیں۔

سپریم کورٹ نے آگاہ کیا کہ وفد میں ڈائریکٹر جنرل ایف جے اے، سیکریٹری لا کمیشن، ڈپٹی رجسٹرار جوڈیشل اور سینئر ڈپٹی ڈائریکٹر سافٹ ویئر بھی شامل ہے۔

اعلامیے میں کہا گیا کہ دورے کا مقصد عدالتی کارکردگی، کیس مینجمنٹ کا مطالعہ ہے، وفد ٹیکنالوجی اور اے آئی کے عدالتی استعمال کا جائزہ لے گا اور وفد کو آئینی عدالت ترکیے میں ڈیجیٹل نظام پر بریفنگ دی جائے گی۔

سپریم کورٹ کا وفد کورٹ آف کسیشن، ترک بار ایسوسی ایشنز سے بھی ملاقات کرے گا، ترک جسٹس اکیڈمی اور وزارت انصاف کا آئی ٹی ڈائریکٹوریٹ بھی دورہ ہوگا۔

اعلامیے میں کہا گیا کہ دورہ عدالتی اصلاحات اور عالمی تعاون کے عزم کی عکاسی کرتا ہے، پاکستان میں عدالتی نظام میں جدید طریقے اپنانے کی بنیاد رکھی جائے گی اور دورہ پاک-ترک عدالتی تعاون کو مستحکم بنانے کا ذریعہ بنے گا۔