راولپنڈی؛ گھر میں گیس لیکیج دھماکے سےآگ لگ گئی، 5 افراد زخمی

دارالحکومت کے جڑواں شہر راولپنڈی میں ایک گھر میں گیس لیکیج دھماکے سے آگ لگ گئی، جس میں 5 افراد زخمی ہو گئے۔

امدادی ذرائع کے مطابق راولپنڈی کے علاقے جھنڈا چیچی عزیز آباد میں ایک گھر میں گیس لیکیج کے باعث دھماکا ہوا جس کے نتیجے میں آگ لگ گئی اور 5افراد شدید زخمی ہو گئے۔ زخمیوں کو انتہائی تشویشناک حالت میں قریبی اسپتال منتقل کر دیا گیا ہے، جہاں انہیں فوری طبی امداد دی جا رہی ہے۔

دھماکے سے متاثرہ گھر کی دیوار بھی منہدم ہو گئی، جس سے علاقے میں خوف و ہراس پھیل گیا۔ واقعے کی اطلاع ملتے ہی ریسکیو ٹیمیں اور محکمہ گیس کا عملہ موقع پر پہنچ گیا اور امدادی کارروائیاں شروع کر دیں۔

ابتدائی طور پر امکان ظاہر کیا جا رہا ہے کہ بند گھر میں جمع ہونے والی گیس نے آگ پکڑنے پر زور دار دھماکے کی صورت اختیار کی۔

دوسری جانب پولیس کا کہنا ہے کہ  علاقے میں گیس پائپ لائن میں لیکیج کی بھی شکایت تھی جو مکینوں سمیت اہلیان علاقہ نے محکمہ سوئی گیس کو کی تھی۔ گھر کے مکین صبح اٹھے اور ناشتہ بنانے لگے تو اچانک دھماکے سے آگ بھڑک اٹھی ، اس دوران یکے بعد دیگر دھماکے بھی سنے گئے اور پھر اہلیان محلہ نے اپنی مدد آپ کے تحت زخمیوں کو اسپتال  منتقل کیا ۔

زخمیوں میں سے 2 کی حالت تشویشناک بتائی جاتی ہے ۔دھماکا اس قدر زور دار تھا کہ مکان کو بھی نقصان پہنچا۔