پنجاب کے 7 اضلاع کیلیے چین سے الیکٹرک بسوں کی کھیپ روانہ ہوگئی ہے، وزیراعلیٰ پنجاب

وزیراعلیٰ پنجاب مریم نواز نے لاہور کے علاوہ پنجاب کے 7 اضلاع میں عوام کیلیے جدید الیکٹرک بسیں چلانے کا اعلان کردیا، جس کا کرایہ صرف 20 روپے ہوگا۔

سماجی رابطے کی سائٹ ایکس پر اپنے پیغام میں مریم نواز نے عوام کو خوش خبری سنائی کہ پنجاب کے اضلاع میں عوام 20 روپے میں الیکٹرک بس پر شاندار اور آرام دہ سفر کریں گے، جس کے لیے  ایئرکنڈیشنڈ ،وائی فائی اور دیگر سہولتوں سے  لیس بسیں تیار ہیں۔

انہوں نے بتایا کہ چین کے شہر یانٹائی کی بندرگاہ پر 100 الیکٹرک بسوں کا  فلیٹ بحری جہاز پرلوڈنگ جاری ہے آج رات پاکستان روانہ ہوگا۔  طویل عرصے سے پبلک ٹرانسپورٹ نظام سے محروم اضلاع میں بسیں ترجیحی بنیادوں پر چلائی جارہی ہیں-

مریم نواز کے مطابق میانوالی،اوکاڑہ، ننکانہ صاحب، مظفرگڑھ،وہاڑی، پاکپتن اور ڈیرہ غازی خان  میں ای بسیں چلائی جارہی ہیں، جن کا کرایہ صرف 20 روپے ہوگا۔

وزیراعلیٰ پنجاب نے بتایا کہ ڈسٹرکٹ کے لئے ماحول دوست الیکٹرک بسوں میں  ایئر کنڈیشنڈ، وائی فائی اور دیگر سہولیتیں بھی ہوں گی اور یہ مکمل طور پر خودکار ٹکٹنگ سسٹم سے لیس ہوں گی۔

مریم نواز نے اعلان کیا کہ  اضلاؑ میں چلائی  جانے والی الیکٹرک بسوں پر اسپیشل پرسن بھی سفر کر سکیں گے، پہلی مکمل الیکٹرک بسیں پنجاب کے شہریوں کو محفوظ، آرام دہ اور پُر سکون سفر فراہم کریں گی۔