پاکستان کا 79 واں یومِ آزادی، معرکۂ حق کی عظیم فتح سے روشن عہد کا آغاز
ایکسپریس نیوز کی جانب سے قوم کو 78واں جشن آزادی مبارک
ملک بھر میں 79 واں یوم آزادی جوش و جذبے کے ساتھ منایا جا گیا، رواں سال یوم آزادی کو معرکہ حق کی عظیم فتح سے منسوب کیا گیا تھا۔
ایکسپریس نیوز کے مطابق پاکستان میں رات 12 بجتے ہی ملک کے چھوٹے بڑے شہروں میں یوم آزادی کا بھرپور طریقے سے استقبال کیا گیا۔
شہری سڑکوں پر اُمڈ آئے، فضا پاکستان زندہ باد کے نعروں سے گونچ اٹھی، چھوٹی بڑی ریلیاں اور مختلف ثقافتی شوز کا انعقاد کیا گیا، شہریوں نے ملی نغموں اور ڈھول کی تھاپ پر بھنگڑے ڈالے۔
صبح کا آغاز وفاقی دارالحکومت میں 31 اور صوبائی دارالحکومتوں میں 21،21 توپوں کی سلامی سے کیا گیا، مساجد میں ملکی استحکام، خوش حالی کے لیے دعائیں کی گئیں۔
شہر شہر ریلیاں، جلوس اور میوزیکل شوز کا انعقاد بھی کیا گیا جبکہ بچے اور بڑے قومی پرچموں کے ہمراہ بیجز لگا کر گھروں سے باہر نکلے اور پاکستان زندہ باد کے نعرے لگائے۔
ملک بھر میں جشن آزادی کی مناسبت سے تقریبات کا انعقاد کیا گیا تھا جس میں بانیان پاکستان کی عظیم جدوجہد کو خراج تحسین اور ملک کو دفاعی، معاشی مضبوط بنانے کا عزم کیا گیا۔
یوم آزادی کی مرکزی تقریب مزارقائد پر گارڈز کی تبدیلی کے ساتھ ہوئی جس کے بعد مختلف سیاسی، سماجی شخصیات نے مزار قائد پر حاضری دے کر قائد محمد علی جناح کی جدوجہد کو خراج تحسین پیش کیا۔
اسلام آباد کے پریڈ گراؤنڈ میں دفاعی نمائش کا انعقاد کیا گیا جس میں عوام کو بھی داخلے کی اجازت دی گئی۔
قوم نے اس عزم کا اعادہ کیا کہ اگر بھارت نے کسی بھی قسم کی جارحیت کی تو اُس کا متحد ہوکر بھرپور جواب دیا جائے گا۔
اس کے علاوہ دنیا بھر میں مقیم پاکستانیوں نے بھی 79 واں یوم آزادی ملی جوش و جذبے سے منایا اوراسی طرح سفارت خانوں میں بھی خصوصی تقاریب کا انعقاد کیا گیا۔