قوم نے دہشتگردی کو شکست دی، قربانیوں کو ہمیشہ یاد رکھا جائے گا، وزیراعظم

وزیراعظم محمد شہباز شریف کا کہنا ہے کہ دہشت گردی کے ناسور کو پاکستان نے بحیثیت قوم بڑی بہادری، عزم و ہمت اور قربانیاں دے کر شکست دی ہے۔

دہشت گردی کے شکار اور متاثرین کو خراج تحسین پیش کرنے کے عالمی دن پر پیغام دیتے ہوئے وزیراعظم نے کہا کہ  پاکستان آج دنیا کے ساتھ ہم آواز ہو کر دہشت گردی کے شکار  اور اس کے  متاثرین سے اظہار یکجہتی کرتا ہے۔ دہشت گردی کے متاثرین سے اظہار یکجہتی پاکستان کے پر خلوص قومی جذبات کی عکاس ہے۔

انہوں نے کہا کہ پاکستان دنیا کا وہ واحد ملک ہے جس کے ہر عمر کے شہری، مسلح افواج، قانون نافذ کرنے والے اداروں نے صف اول میں رہتے ہوئے اس برائی کے خلاف جنگ کی ہے۔ دہشت گرد اور دہشت گردی کے واقعات پاکستان کی قومی غیرت و حمیت اور ہمارے امن و خوشحالی کے عزم کو اللہ کے فضل و کرم سے  پسپا نہیں کر سکے۔

وزیراعظم نے کہا کہ پاکستان نے دہشت گردی کے خلاف عالمی جنگ میں ہراول دستے کا کردار ادا کرتے ہوئے نہ صرف 90 ہزار قیمتی جانوں کا نذرانہ پیش کیا بلکہ ہماری ملکی معیشت کو بھی خاطر خواہ نقصان کا اٹھانا پڑا۔ ملک کے طول و عرض میں ہر شہر ہر بستی میں کوئی نہ کوئی شاہراہ، بازار اور اسکول دہشت گردی کے واقعات اور متاثرین کی روداد سناتی ہیں۔

انہوں نے کہا کہ جہاں دہشت گردی کا شکار پاکستانی معاشرہ اپنی قربانیوں اور مصائب پر افسردہ ہے، وہیں اپنی بہادری اور شجاعت کی داستانوں پر فخر سے سر بلند بھی ہے۔ پاکستان کی نوجوان نسل اس عزم کے ساتھ پروان چڑھ رہی ہے کہ ملکی سلامتی اور قومی اقدار کی حفاظت ہر شہری کا اہم قومی فریضہ ہے۔

وزیراعظم نے کہا کہ حکومت پاکستان، صوبائی حکومتیں، تمام شہری، قانون نافذ کرنے والے اور انٹیلیجنس اداروں، پولیس اور مسلح افواج کے ساتھ کمر بستہ ہو کر اس برائی کو جڑ سے ختم کرنے کے لیے کوشاں ہیں۔ پاکستان نے کامیابی سے آپریشن ضرب عضب، آپریشن رد الفساد اور بے شمار انٹیلیجنس بیسڈ آپریشنز کے ذریعے دہشت گردوں کے عزائم کو شکست فاش دی ہے۔

انہوں نے کہا کہ پاکستان کے سول اور ملٹری انٹیلیجنس اداروں نے پیشہ ورانہ مہارت کو بروئے کار لاتے ہوئے ملک عزیز کو بے شمار دہشت گردی کے واقعات سے بچایا ہے۔ آج ہم بحیثیت قوم جہاں دہشت گردی کے شکار متاثرین اور شہداء کو سلام پیش کرتے ہیں، وہیں دہشت گردی سے نبرد آزما اداروں کو لائق صد تحسین سمجھتے ہیں۔

انکا کہنا تھا کہ نیشنل ایکشن پلان (NAP) دہشت گردی کے خلاف ہماری جامع حکمت عملی کا بہترین عکاس ہے۔ یہ پلان نہ صرف دہشت گردی کو زمینی مسلح آپریشنز بلکہ، دیگر اقدامات جن میں شدت پسندی کے خلاف نظریاتی، انتظامی، ادارہ جاتی اور بیانیہ کے محاذ پر بھی مربوط حکمت عملی کو بیان کرتا ہے۔

وزیراعظم نے کہا کہ دہشت گردی کے خلاف جنگ میں قومی اتحاد و یگانگت اور یکسوئی پاکستان میں امن وسلامتی، ترقی وخوشحالی اور روشن مستقبل کی ضمانت ہے۔