دو سال میں ٹاؤنز کو ایک روپے کا ترقیاتی فنڈ نہیں دیا گیا، جماعت اسلامی

جماعت اسلامی کراچی نے کہا کہ ہے کہ دو سال میں جماعت اسلامی کے ٹاؤنز کو ایک روپے کا ترقیاتی فنڈ بھی نہیں دیا گیا اور میئر کراچی مرتضیٰ وہاب عوام کر گمراہ کر رہے ہیں۔

ترجمان جماعت اسلامی نے میئر کراچی مرتضیٰ وہاب کی پریس کانفرنس پر ردعمل دیتے ہوئے کہا کہ بوکھلاہٹ کا شکار ناکام میئر عوام کو گمراہ کر رہے ہیں، حکومت سندھ کی جانب سے ٹاؤنز کو ملنے والی او زیڈ ٹی صرف سرکاری ملازمین کی تنخواہوں کی مد میں ہے۔

انہوں نے کہا کہ دو سال میں جماعت اسلامی کے ٹاؤنز کو ایک روپے کا ترقیاتی فنڈ بھی نہیں دیا گیا، حکومت سندھ کے پاس عوامی مسائل حل کرنے کا کوئی منصوبہ نہیں ہے۔

ترجمان جماعت اسلامی نے بتایا کہ شہر کو کھنڈر بنانے والے اپنی ناکامی چھپانے کے لیے پروپیگنڈہ کر رہے ہیں، کراچی کے عوام ٹیکس دیتے ہیں مگر شہر میں ترقیاتی کام صفر ہیں۔

ان کا کہنا تھا کہ پاکستان پیپلز پارٹی (پی پی پی) اور اس کے ناکام میئر عوام دشمن پالیسیوں پر گامزن ہیں، کراچی کے ٹاؤنز کو فنڈز سے محروم رکھنا کھلی ناانصافی ہے۔