لاہور سمیت صوبے بھر میں پنجاب پولیس کے آپریشنز، متعدد گرفتار

پنجاب پولیس کے لاہور سمیت صوبہ بھر میں سرچ، سویپ، کومبنگ آپریشنز میں متعدد حراست میں لے لیے گئے۔

ترجمان پنجاب پولیس کے مطابق گزشتہ 24 گھنٹوں کے دوران 500 کومبنگ آپریشنز کیے گئے جن میں  16 ہزار 159 سے زائد مشتبہ افراد کی چیکنگ کی گئی جبکہ  57 مشکوک افراد حراست میں لئے گئے۔

ترجمان نے بتایا کہ کیے جانے والے 33 سرچ اینڈ سویپ آپریشنز میں 3577 سے زائد افراد سے پوچھ گچھ کی گئی اور 02 مشتبہ افراد حراست میں لیے گئے۔

ترجمان پنجاب پولیس نے بتایا کہ سنگین جرائم میں ملوث 645 اشتہاری، 193 عدالتی مفرور، 87 عادی مجرمان بھی گرفتار کر لیے گئے۔جرائم پیشہ و مشتبہ افراد کے قبضہ سے بڑی تعداد میں ناجائز اسلحہ اور گولیاں برآمد کر لی گئیں۔

ترجمان نے مزید بتایا کہ جرائم پیشہ افراد کے خلاف کاروائیوں کے دوران 10 مجرمان کیفر کردار کو پہنچے جبکہ  05 زخمی حالت میں گرفتار کر لیے گئے۔

آئی جی پنجاب کا کہنا تھا کہ ملک دشمن و جرائم پیشہ عناصر کا محاسبہ کرنے کیلئے سرچ، سویپ اینڈ کومبنگ آپریشنز جاری رکھے جائیں۔