پنجاب کے عوام کو اکیلا نہیں چھوڑ سکتی تنقید کروگے تو زوردار جواب ملے گا، مریم نواز

وزیراعلیٰ پنجاب مریم نواز نے کہا ہے کہ آفت آئی تو پنجاب کے زخموں پر نمک چھڑکا گیا، میں جب اپنا پانی کہتی ہوں تو اس کا مطلب پنجاب کا پانی ہوتا ہے۔

یہ بات انہوں ںے لاہور میں الیکٹرک بسوں کے فیز ٹو منصوبے کی افتتاحی تقریب سے خطاب کرتے ہوئے کہی۔

انہوں نے کہا کہ ان بسوں کا کرایہ بہت معمولی ہے یہ انٹرنیٹ کی سہولت سے آراستہ ہیں اس کا کرایہ محض بیس روپے رکھا گیا ہے، لاہور میں مزید الیکٹرک بسیں بھی فراہم کی جائیں گی، پنجاب کی ترقی میرا مشن ہے، لاہور میں الیکٹرک بسیں عوام کے لیے تحفہ ہیں، الیکٹرک بسوں میں خصوصی افراد اور بزرگوں کے لیے سفر مفت ہوگا۔

وزیراعلیٰ پنجاب نے کہا کہ مجھے کہا گیا کہ میں جب اپنا پانی کہتی ہوں تو یہ جاتی امرا کا پانی نہیں ہوتا پنجاب کا پانی ہوتا ہے۔

مجھے معلوم ہوا کہ کے پی میں کلاؤڈ برسٹ سے پانچ سو بندے جاں بحق ہوئے میں نے تھائی لینڈ سے علی امین گنڈاپور کو کال کی اور پوچھا کہ پنجاب آپ کی کیا مدد کرسکتا ہے؟ آج آفت ہم پر آئی پنجاب کے زخموں پر نمک چھڑکا گیا، جب ہماری امدادی کارروائیاں پنجاب میں جاری تھیں تو پریس کانفرنس میں ہمارا مذاق اڑایا گیا۔

مریم نواز نے کہا کہ مجھے کہا جارہا تھا کہ عالمی اداروں سے مدد کیوں نہیں مانگی؟ جب عوام کی خدمت کی نیت ہو تو کسی کے آگے ہاتھ پھیلانے کی ضرورت نہیں پڑتی، کے پی کے عوام بھی ہمارے عوام ہیں مگر گمراہ کرکے لوگوں کو پنجاب کے خلاف نکالا گیا یہ عصبیت ہے۔

وزیراعلیٰ پنجاب نے کہا کہ ہمارا پانی پنجاب کے کسان کا حق تھا جسے سیاست کی نذر کردیا گیا، پنجاب کے عوام کو اکیلا نہیں چھوڑ سکتی ان کے خلاف بات کروگے تو زوردار جواب ملے گا، مریم نواز نے اپنے لوگوں کے حق کے لیے آواز بلند کی اس لیے مریم نواز کبھی معافی نہیں مانگے گی، معافی تو انہیں مانگی چاہیے جنہوں نے پنجاب میں امداد کی فراہمی کے دوران ہم پر تنقید کی۔

الیکٹرک بس منصوبہ

منصوبے کے تحت وزیراعلیٰ کی جانب سے لاہور کے لیے مزید 40 ’’الیکٹرو بسوں‘‘ کا تحفہ دیا گیا ہے۔ ایکسپو سینٹر آمد پر وزیراعلی مریم نواز شریف کا والہانہ استقبال کیا گیا۔ تقریب گاہ میں گھنٹوں قبل عوام کا بے پناہ رش ہوگیا، کارکن پارٹی پرچم لے کر نعرے لگاتے رہے۔

وزیراعلی مریم نواز شریف کی گاڑی پھولوں کی پتیوں سے لد گئی، راستے میں ہر سو پھول ہی پھول بکھر گئے۔ تقریب میں الیکٹرو بس کے بارے میں دستاویزی فلم بھی دکھائی گئی

لاہور الیکٹرو بس پراجیکٹ فیز ٹو کے بارے میں بریفنگ میں بتایا گیا کہ عوام کی ضرورت کے پیش نظرفیز ٹو میں الیکٹرو بس دو نئے روٹ پر چلائی جائے گی، رائے ونڈ سے جناح ٹرمینل ٹھوکر نیاز بیگ تک الیکٹرو بس کا پہلا روٹ ہوگا۔

دوسرے روٹ میں الیکٹرو بس جناح ٹرمینل ٹھوکر نیاز بیگ سے ہربنس پورہ تک چلے گی
الیکٹرو بس میں بزرگ، خواتین، طلبا اور اسپیشل افراد سے کرایہ نہیں لیا جائے گا، الیکٹرو بس میں فری وائی فائی، موبائل چارجنگ پورٹ میسر ہوگی، خواتین کے الیکٹرو بس میں الگ کمپارٹمنٹ ہوں گے، سی سی ٹی وی سے مانیٹرنگ بھی ہوگی۔