سعودی عرب میں برفباری کے بعد صحراؤں میں اونٹوں کے نایاب مناظر وائرل
سعودی عرب کے شمالی علاقوں میں غیر معمولی برفباری کے بعد تبوک اور تروجینا کے پہاڑ برف سے ڈھک گئے، جس سے یہ علاقے ایک خوبصورت سرمائی تفریح گاہ میں تبدیل ہو گئے۔
اس نایاب منظر کو دیکھنے کے لیے مقامی افراد اور سیاح بڑی تعداد میں پہاڑی علاقوں کا رخ کر رہے ہیں۔
سعودی پریس ایجنسی (SPA) کے مطابق تروجینا ہائی لینڈز میں برفباری سے پہاڑوں اور چٹانوں پر سفید چادر بچھ گئی، جس نے شمالی سعودی عرب کے مناظر کو یکسر بدل دیا۔ شہریوں نے اس موقع پر تصاویر اور ویڈیوز بنا کر سوشل میڈیا پر شیئر کیں، جو تیزی سے وائرل ہو رہی ہیں۔
سوشل میڈیا پر ایک ویڈیو خاص طور پر توجہ کا مرکز بنی، جس میں برف سے ڈھکے صحرا میں کھڑے اونٹ دکھائی دے رہے ہیں، جسے سعودی عرب کے نایاب ترین مناظر میں سے ایک قرار دیا جا رہا ہے۔
Snowfall blanketed parts of Tabuk and Hail, with residents stepping out to ski and enjoy the icy scenes—a moment you don’t see every day in the Kingdom! pic.twitter.com/7hj9iOEZ2A
تروجینا پہاڑ، جو نیوم منصوبے کا حصہ ہیں، سطح سمندر سے تقریباً 2 ہزار 600 میٹر بلند ہیں اور خلیجِ عقبہ سے تقریباً 50 کلومیٹر کے فاصلے پر واقع ہیں، جس کے باعث یہ علاقہ سرمائی سیاحت کے لیے آسانی سے قابلِ رسائی سمجھا جاتا ہے۔
محکمہ موسمیات کے مطابق ملک کے مختلف حصوں میں بارش، گرج چمک، تیز ہوائیں اور دھند کا امکان ہے، جبکہ شہریوں اور سیاحوں کو احتیاطی تدابیر اختیار کرنے کی ہدایت کی گئی ہے۔