دھند میں کمی کے بعد سنٹرل ریجن کی بند موٹرویز ٹریفک کے لیے کھول دی گئیں

دھند کی شدت میں کمی اور حدِ نگاہ میں بہتری کے بعد سنٹرل ریجن میں بند کیے گئے موٹروے کے مختلف سیکشنز کو ٹریفک کے لیے کھول دیا گیا ہے۔

ترجمان موٹروے پولیس سینٹرل ریجن سید عمران احمد کے مطابق لاہور سیالکوٹ موٹروے ایم 11، موٹروے ایم 2 اور موٹروے ایم 3 کو حدِ نگاہ بہتر ہونے پر دوبارہ بحال کر دیا گیا ہے۔

ترجمان کے مطابق اس سے قبل شدید دھند کے باعث موٹروے ایم 2 لاہور سے کوٹ مومن تک، موٹروے ایم 11 لاہور تا سیالکوٹ اور موٹروے ایم 3 فیض پور سے جڑانوالہ تک بند کی گئی تھیں، جبکہ بڑی گاڑیوں کے لیے ایم 3 فیض پور سے درخانہ تک ٹریفک معطل رہی۔

اسی طرح موٹروے ایم 4 پنڈی بھٹیاں سے فیصل آباد تک اور بڑی گاڑیوں کے لیے پنڈی بھٹیاں سے عبدالحکیم تک آمدورفت بند کر دی گئی تھی۔

موٹروے پولیس کے مطابق موٹرویز کی بندش کا مقصد عوام کی جان و مال کا تحفظ تھا، کیونکہ دھند میں لین کی خلاف ورزی سنگین حادثات کا سبب بن سکتی ہے۔

ترجمان نے بتایا کہ قومی شاہرات پر لاہور، مانگا منڈی، پھول نگر، پتوکی، رینالہ خورد، اوکاڑہ، ساہیوال، اقبال نگر، کسوال اور میاں چنوں میں دھند چھائی رہی، جہاں حدِ نگاہ 0 سے 100 میٹر تک ریکارڈ کی گئی۔

موٹروے پولیس نے روڈ یوزرز کو ہدایت کی ہے کہ لین ڈسپلن پر سختی سے عمل کریں، غیر ضروری سفر سے اجتناب کریں اور دن کے اوقات میں سفر کو ترجیح دیں۔

ترجمان کے مطابق دھند میں صبح 10 بجے سے شام 6 بجے تک کے اوقات نسبتاً محفوظ سمجھے جاتے ہیں۔

ڈرائیور حضرات فوگ لائٹس کا استعمال یقینی بنائیں، تیز رفتاری سے گریز کریں اور آگے چلنے والی گاڑی سے محفوظ فاصلہ برقرار رکھیں۔

موٹروے پولیس نے مزید کہا کہ کسی بھی قسم کی رہنمائی یا مدد کے لیے ہیلپ لائن 130 پر رابطہ کیا جا سکتا ہے۔