شدید برف باری کے دوران پاک فوج اور ریسکیو 1122 کی امدادی کارروائیاں جاری

شدید برف باری کے دوران پاک فوج اور ریسکیو 1122 کا ریلیف آپریشن جاری ہے۔

پاک فوج نے ضلع کرم کے گاؤں مناتو سے مقامی کالج تک برف سے ڈھکے راستوں کو صاف کردیا، ریلیف آپریشن کے بعد مناتو– صدا روڈ پر ٹریفک کی روانی بحال کر دی گئی۔ ریلیف آپریشن کے دوران برف میں پھنسی متعدد گاڑیوں کو بحفاظت نکال کر محفوظ مقامات پر منتقل کیا گیا۔

سیکورٹی فورسز کی بروقت کارروائی سے علاقے میں اہم رابطوں کی بحالی ممکن ہوئی۔ مقامی آبادی نے سخت موسمی حالات میں مشکلات کم کرنے پر فورسز کی کاوشوں کو سراہا۔

دوسری جانب وادی تیراہ میں شدید برفباری کے باعث پیدا ہونے والی صورتحال کے پیش نظر ریسکیو 1122 کا امدادی آپریشن گزشتہ 36 گھنٹوں سے مسلسل جاری ہے۔ سخت سردی، منفی درجہ حرارت اور دشوار گزار راستوں کے باوجود ریسکیو اہلکار فیلڈ میں موجود ہیں اور امدادی سرگرمیاں بلا تعطل انجام دے رہے ہیں۔

ریسکیو 1122 کی ٹیموں نے ایمرجنسی گاڑیوں اور ہیوی مشینری کی مدد سے مختلف مقامات پر کارروائیاں کرتے ہوئے اب تک 1100 سے زائد متاثرہ افراد کو بحفاظت ریسکیو کیا جبکہ 120 سے زائد پھنسے ہوئے گاڑیوں کو نکال لیا گیا ہے۔

اس وسیع آپریشن میں ضلع خیبر کے ساتھ ساتھ پشاور، مردان، صوابی اور نوشہرہ سے 100 سے زائد ریسکیو افسران اور اہلکار حصہ لے رہے ہیں۔ ریسکیو ٹیموں نے متاثرین کو بروقت محفوظ مقامات پر منتقل کیا اور ضروری امداد فراہم کی۔

 آزاد جموں و کشمیر کے علاقے عباس پور میں پاک فوج، سول انتظامیہ اور ریسکیو 1122 نے کامیاب مشترکہ ریسکیو آپریشن انجام دیا جس میں مختلف مقامات پر محصور 77 شہریوں کو بحفاظت نکال کر محفوظ مقامات پر منتقل کردیا گیا۔