پیٹرولیم مصنوعات کی قیمتوں میں اضافہ کرکے عوام پر ڈرٹی بم گرایا گیا، منعم ظفر

امیر جماعت اسلامی کراچی منعم ظفر خان کا کہنا ہے کہ حکومت نے پیٹرولیم مصنوعات کی قیمتوں میں اضافہ کرکے عوام پر ڈرٹی بم گرایا ہے، گزشتہ ایک ماہ 63 فیصد پیٹرول کی قیمت میں اضافہ ہو چکا ہے۔

کراچی میں ادارہ نور حق میں پریس کانفرنس کرتے ہوئے منعم ظفر نے کہا کہ ملک میں ہر پیدا ہونے والا بچہ 3 لاکھ روپے کا مقروض ہوچکا لیکن حکمرانوں کی شاہ خرچیاں ختم نہیں ہو رہی، مریم نواز طیارہ خرید رہی ہیں اور چیئرمین سینیٹ نے 9 کروڑ کی نئی گاڑی لے لی لیکن عوام پر پیٹرول کا بوجھ ڈال دیا گیا۔

انہوں نے کہا کہ ڈھائی کروڑ افراد موٹر سائیکل پر سفر کرتے ہیں، عوام کو مقروض کر دیا اور خود عیاشیاں کر رہے ہیں۔ جنوبی ایشیا میں جس تناسب سے اضافہ ہوا ہے اس کے مقابلے میں یہاں بہت زیادہ اضافہ کیا گیا۔

منعم ظفر نے کہا کہ حکومت پیٹرول کی قیمتوں پر اضافہ واپس لے، جماعت اسلامی احتجاجی تحریک کا اعلان کرتی ہے اور آج شہر بھر میں احتجاجی مظاہرے کیے جائیں گے، رات 8 بجے ملینیم مال کے سامنے احتجاج کیا جائے گا۔

انہوں نے کہا کہ کنٹومنٹ بورڈ کی حلقہ بندیوں کے حوالے سے سندھ حکومت الیکشن کمیشن پر دباؤ ڈال رہی ہے، الیکشن کمیشن شفاف الیکشن کرانے میں ماضی میں ناکام ہوا تھا، من پسند حلقہ بندیاں انتخابات سے قبل دھاندلی کے مترادف ہے۔ کراچی کے ساتھ پیپلز پارٹی اور ایم کیو ایم نے ظلم کیا۔

امیر جماعت اسلامی کراچی کا کہنا تھا کہ ساون کے اندھے کو ہرا ہرا ہی نظر آتا ہے اور میئر کراچی اس محاورے پر پورا اترتے ہیں، ان کو بارش میں ہر چیز ٹھیک ہی نظر آرہی ہے لیکن قابض میئر کو کراچی کی تباہی نظر نہیں آتی۔