’’مذہبی خیالات رکھتی ہوں، کسی غیر مسلم سے شادی نہیں کرسکتی‘‘، ریم شیخ

بھارتی اداکارہ ریم شیخ نے اپنی ذاتی زندگی، مذہبی وابستگی اور شادی سے متعلق خیالات کا اظہار کرتے ہوئے واضح کیا ہے کہ وہ کسی غیر مسلم شخص سے شادی کا تصور نہیں رکھتیں۔

ایک حالیہ پوڈکاسٹ میں گفتگو کے دوران ریم شیخ سے سوال کیا گیا کہ اگر انہیں کسی دوسرے مذہب سے تعلق رکھنے والے شخص سے محبت ہو جائے تو کیا وہ اس رشتے کو قبول کریں گی؟

اس سوال کے جواب میں اداکارہ نے دوٹوک انداز اپناتے ہوئے کہا کہ ان کے لیے ایسا ممکن نہیں کیونکہ وہ اپنی مذہبی شناخت کو بہت اہمیت دیتی ہیں۔ ریم شیخ کے مطابق وہ باقاعدگی سے پانچ وقت کی نماز ادا کرتی ہیں اور اب روزے رکھنے کی بھی پابندی کر رہی ہیں، اس لیے ان کے لیے ایسے شخص کے ساتھ زندگی گزارنا مشکل ہوگا جو ان کے عقیدے سے ہم آہنگ نہ ہو۔

انہوں نے کہا کہ زندگی کے ہر مشکل مرحلے میں وہ سب سے پہلے اللّٰہ سے رجوع کرتی ہیں، اس لیے وہ اپنا شریکِ حیات بھی ایسا چاہتی ہیں جو اللّٰہ پر ایمان رکھتا ہو۔ اداکارہ کا کہنا تھا کہ ان کے لیے روحانی ہم آہنگی شادی کے فیصلے میں انتہائی اہم ہے۔