ایک پروٹین میں اضافہ، دماغ کو الزائمر سے لڑنے میں طاقتور بنا سکتا ہے

سائنس دانوں نے ایک ایسا طریقہ دریافت کر لیا ہے جس کے ذریعے دماغ اپنے ہی سپورٹ سیلز کو متحرک کر کے الزائمر کے نقصان دہ پلیکس کو خود صاف کر سکتا ہے۔

بیلر کالج آف میڈیسن کے محققین نے ایک ایسا قدرتی نظام دریافت کیا ہے جو الزائمرز بیماری کے شکار چوہوں کے دماغ سے نقصان دہ امائلائیڈ پلیکس کو صاف کرنے کے ساتھ ساتھ یادداشت اور سوچنے کی صلاحیت کو بھی محفوظ رکھنے میں مدد دیتا ہے۔

یہ اہم دریافت دماغ کے مخصوص خلیوں یعنی آسٹروسائٹس پر مرکوز ہے۔ یہ ستارے کی شکل کے سپورٹ سیلز ہوتے ہیں جنہیں اس طرح متحرک کیا جا سکتا ہے کہ وہ الزائمرز میں بننے والے زہریلے مواد کو ختم کریں۔

نیچر نیورو سائنس میں شائع ہونے والی تحقیق میں یہ بات سامنے آئی کہ ساکس 9 نامی پروٹین کی مقدار بڑھانے سے ان خلیوں کی صفائی کی صلاحیت نمایاں طور پر بہتر ہو جاتی ہے۔

تحقیق میں حاص شدہ نتائج ایک نئے علاج کی امید پیدا کرتے ہیں جس میں دماغ کے اپنے دفاعی نظام کو مضبوط بنا کر ذہنی کمزوری کی رفتار کو سست کیا جا سکتا ہے۔

تحقیق کے مرکزی مصنف ڈاکٹر ڈونگ-جُو چُوئی کے مطابق آسٹروسائٹس دماغی رابطوں کو بہتر بنانے اور یادداشت کو محفوظ رکھنے جیسے دماغی نظام کے لیے نہایت اہم کام انجام دیتے ہیں لیکن عمر بڑھنے کے ساتھ ان خلیوں کی کارکردگی میں نمایاں تبدیلیاں آتی ہیں، جن کا مکمل کردار ابھی تک واضح نہیں ہو سکا۔