مولانا ادریس شہادت؛ مسلح حملہ آوروں نے کس طرح ریکی کی؟

چارسدہ کی معروف مذہبی شخصیت، سابق رکن صوبائی اسمبلی اور شیخ الحدیث مولانا محمد ادریس ترنگزئی کی شہادت پر تحقیقات جاری ہیں۔

تحقیقاتی ٹیم کے مطابق مولانا ادریس پر حملے میں 9 ایم ایم پستول استعمال کیا گیا، مولانا ادریس پر فائرنگ مسلح حملہ آوروں نے کی اور کل 4 افراد حملے میں ملوث نکلے۔

تحقیقاتی ٹیم کے مطابق دو افراد نے ریکی اور دیگر نے سہولت کاری کی، گھر سے مدرسے کے درمیان 2 کلو میٹر فاصلہ تھا، قبرستان کے قریب حملہ آوروں نے ریکی کی۔

تحقیقاتی ٹیم کے مطابق مرکزی حملہ آور کی نشاندہی ہوگئی، عینی شاہدین کے بیانات قلمبند کر لیے گئے۔

واضح ہے کہ گزشتہ روز مولانا محمد ادریس ترنگزئی قاتلانہ حملے میں شہید ہوگئے تھے، ان کے قتل کی تحقیقات کے لیے تین رکنی کمیٹی بنائی گئی۔

مولانا محمد ادریس پر فائرنگ کا واقعہ ضلع چارسدہ کے علاقے اتمانزئی میں پیش آیا۔ واقعے میں دو پولیس اہلکار بھی زخمی ہوئے، مولانا محمد ادریس دورہ حدیث درس دینے کے لیے دارالعلوم اتمانزئی جا رہے تھے کہ یہ واقعہ رونما ہوا۔