دبئی میں خطرناک ڈرائیونگ؛ ایشیائی شخص پر لاکھوں روپے جرمانہ؛ ویڈیو وائرل

دبئی پولیس نے خطرناک ڈرائیونگ، تیز رفتاری اور سڑک پر خطرناک کرتب دکھانے والے ایک ایشیائی ڈرائیور کو گرفتار کر لیا۔

عرب میڈیا کے مطابق ٹریفک پولیس کی جانب سے جاری کی گئی ویڈیو میں دیکھا جا سکتا ہے کہ ملزم گاڑی کو تیز رفتاری میں لہراتے ہوئے مختلف لینز میں چلا رہا تھا۔

جس کے دوران گاڑی نے کئی خطرناک کٹ مارے اور دوسری گاڑیوں کو غلط سمت سے اوورٹیکنگ کر رہا تھا جس سے دیگر شہریوں کی جان خطرے میں پڑ گئی۔

علاوہ ازیں ڈرائیور نے اس لین پر بھی گاڑی چلائی جو صرف ایمبولینس کے لیے استعمال ہوسکتی تھی اور ہائی ویز قوانین کے تحت یہ ایک انتہائی سنگین جرم ہے۔

دبئی پولیس کے جنرل ڈیپارٹمنٹ آف ٹریفک کے ڈائریکٹر بریگیڈیئر جمعہ سالم بن سویدان نے کہا کہ اس قسم کی حرکات انتہائی سنگین ٹریفک خلاف ورزیوں میں شمار ہوتی ہیں کیونکہ ہائی ویز پر معمولی غلطی بھی بڑے حادثے، گاڑی کے الٹنے یا جانی نقصان کا سبب بن سکتی ہے۔