وزیراعظم کی مشرق وسطیٰ میں جاری کشیدگی ختم کرنے کی اپیل

وزیراعظم شہباز شریف نے  مشرق وسطیٰ میں بڑھتی کشیدگی پر تشویش کا اظہارکرتے ہوئے فریقین  سے  تحمل اور بردباری کا مظاہرہ کرنے کی اپیل کی ہے۔

وزیراعظم شہباز شریف نے مشرق وسطیٰ میں بڑھتی کشیدگی پر تشویش کا اظہار کرتے ہوئے سماجی رابطے کی سائٹ ایکس پر پیغام جاری کیا۔

اپنے پیغام میں انہوں نے لکھا کہ مشرق وسطیٰ میں حالیہ تشدد اس بات کی واضح یاد دہانی ہے کہ کمزور جنگ بندی کتنے سنگین نتائج کا باعث بن سکتی ہے۔ وزیراعظم نے کہا کہ  پاکستان اپنے برادر اور شراکت دار ممالک کے ساتھ مل کر تنازع کے پُرامن اور سفارتی حل کیلئے سنجیدہ کوششیں کر رہا ہے۔

شہباز شریف نے لکھا کہ حتمی مقصد کے حصول کا وقت قریب ہے، تمام فریق امن کو ایک اور موقع دیں، تشدد اور تباہی کے بجائے امن اور سفارتکاری کا راستہ اختیار کیا جائے کیونکہ امن اور سفارتکاری کا راستہ  ہی کامیابی کی روشن امید رکھتا ہے۔