اسکردو انٹرنیشنل ایئرپورٹ کو سیاحوں کیلیے جدید فضائی دروازہ بنانے کا منصوبہ شروع

اسکردو انٹرنیشنل ایئرپورٹ کو سیاحوں کے لیے جدید فضائی دروازہ بنانے کے لیے توسیعی منصوبے پر کام شروع کر دیا گیا ہے۔

ترجمان پاکستان ایئرپورٹس اتھارٹی کے مطابق منصوبے کا مقصد گلگت بلتستان میں سیاحت کے فروغ کے ساتھ ساتھ مسافروں کو جدید اور بہتر سفری سہولیات فراہم کرنا ہے۔ اس سلسلے میں  تعمیراتی کام ابتدائی مراحل میں ہے اور منصوبے کی لائن مارکنگ کی جا رہی ہے۔

ترجمان پی اے اے سیف اللہ خان کے مطابق توسیعی منصوبے کے تحت ٹرمینل عمارت کا رقبہ 21 ہزار مربع فٹ سے بڑھا کر 39 ہزار مربع فٹ کیا جائے گا۔ روانگی لاؤنج میں بیٹھنے کی گنجائش 300 سے بڑھا کر 900 مسافروں تک کی جائے گی، جبکہ آرائیول لاؤنج کی گنجائش 80 سے بڑھا کر 200 مسافروں تک کر دی جائے گی۔ منصوبے میں روانگی اور آمد کے لاؤنجز کے اندر ایگزیکٹو لاؤنج بھی شامل کیا گیا ہے۔