معروف بھارتی اداکار نے شو ملتوی ہونے پر مداحوں سے معذرت کرلی

ملیالم فلم انڈسٹری کے معروف بھارتی اداکار موہن لال کو آسٹریلیا میں ہونے والے اپنے لائیو شو کے ملتوی ہونے پر مداحوں سے معذرت کرنا پڑی۔ پروگرام ویزا جاری ہونے میں غیر متوقع تاخیر کے باعث مقررہ وقت پر منعقد نہیں ہوسکا۔

بھارتی میڈیا کے مطابق موہن لال کا لائیو شو ہفتہ 8 اگست کو سڈنی کے نورویسٹ کنونشن سینٹر میں ہونا تھا، جس میں اداکار کے علاوہ کئی دیگر فنکار بھی شرکت کرنے والے تھے۔ تاہم آسٹریلوی ویزا بروقت نہ ملنے کے باعث موہن لال سنگاپور میں ہی رک گئے اور سڈنی کے لیے روانہ نہ ہوسکے۔

صورتحال پر مداحوں سے معذرت کرتے ہوئے موہن لال نے کہا کہ انہیں خود معلوم نہیں کہ معاملہ اس طرح کیسے پیش آیا۔ اداکار کے مطابق ممکن ہے یہ کسی کلیریکل غلطی کا نتیجہ ہو، تاہم وہ اس صورت حال کی تمام تر ذمہ داری خود قبول کرتے ہیں۔

پروگرام ملتوی ہونے کے باوجود موہن لال کی جانب سے مداحوں سے براہِ راست معذرت نے اس معاملے میں ان کی ذمہ داری اور اپنے مداحوں کے ساتھ وابستگی کا اظہار کیا ہے۔