کراچی، لاہور ایئرپورٹس کی نجکاری میں اہم پیشرفت

کراچی اور لاہور ایئرپورٹس کی نجکاری کے معاملے میں اہم پیش رفت ہوئی ہے اور نجکاری کمیشن بورڈ نے دونوں ایئرپورٹس کی آؤٹ سورسنگ کے لیے ای وائے پارتھنون کی زیر قیادت کنسورشیم کو مالیاتی مشیر مقرر کرنے کی منظوری دے دی اور لیسکو اور میپکو کو بھی بڑی نجکاری کے درجے میں شامل دیا گیا۔

نجکاری کمیشن کے مطابق نجکاری کمیشن بورڈ کا 257 واں اجلاس اسلام آباد میں وزیراعظم کے مشیر برائے نجکاری اور نجکاری کمیشن کے چیئرمین محمد علی کی زیر صدارت منعقد ہوا۔

اجلاس میں علامہ اقبال انٹرنیشنل ایئرپورٹ لاہور اور جناح انٹرنیشنل ایئرپورٹ کراچی کی آؤٹ سورسنگ سے متعلق اہم منظوری دی گئی، بورڈ نے مسابقتی عمل کے نتیجے میں ای وائے پارتھنون کی زیر قیادت کنسورشیم کو دونوں ایئرپورٹس کی آؤٹ سورسنگ کے لیے مالیاتی مشیر کی تقرری کے حوالے سے موزوں ترین امیدوار قرار دینے کی منظوری دے دی۔

بورڈ نے کامیاب کنسورشیم کے ساتھ مالیاتی مشاورتی خدمات کے معاہدے، ایف اے ایس اے، کو حتمی شکل دینے کے لیے ایک مذاکراتی کمیٹی بھی تشکیل دے دی ہے۔

اجلاس میں لاہور الیکٹرک سپلائی کمپنی (لیسکو) اور ملتان الیکٹرک پاور کمپنی (میپکو) کی نجکاری کے حوالے سے بھی اہم فیصلہ کیا گیا اور ان کی نجکاری کو بڑی نجکاری کا درجہ دے دیا ہے، جس کے بعد قابل اطلاق نجکاری کمیشن کے ضوابط کے تحت دونوں کمپنیوں کے لیے مالیاتی مشیر کی تقرری لازم ہو گئی ہے۔

نجکاری کمیشن اب لیسکو اور میپکو کی نجکاری کے لیے مالیاتی مشیر کی تقرری کا عمل شروع کرے گا، لیسکو اور میپکو پاور ڈسٹری بیوشن کمپنیوں، ڈسکوز، کی نجکاری کی چوتھی کھیپ میں شامل ہیں جن کی حکومت نے نجکاری کے لیے نشان دہی کی ہے جبکہ پہلے تین بیچز کی نج کاری کا عمل پہلے ہی جاری ہے۔

نجکاری کمیشن بورڈ نے حکومت کے نجکاری پروگرام کو آگے بڑھانے اور جاری پیش رفت کو مزید تقویت دینے کے عزم کا اعادہ بھی کیا اور بورڈ کے مطابق تمام نجکاری کا عمل شفاف، مسابقتی اور پیشہ ورانہ انداز میں مکمل کیا جائے گا جبکہ حکومت اور پاکستان کے عوام کے سامنے جواب دہی کے ساتھ بہترین قدر کے حصول پر توجہ برقرار رکھی جائے گی۔