ہریتھک روشن کے بیٹے کا ڈیبیو؛ ماں بھی خوش؛ صبا آزاد نے بھی حوصلہ بڑھایا

بالی ووڈ اداکار ہریتھک روشن اور ان کی سابق اہلیہ سوزین خان کے بڑے بیٹے ہریہان روشن نے موسیقی کی دنیا میں قدم رکھتے ہوئے اپنا پہلا گانا ریلیز کردیا۔

سب سے پہلے ہریتھک روشن نے بیٹے کے گانے کو سوشل میڈیا پر شیئر کرتے ہوئے اس کے لیے محبت اور اعتماد کا اظہار کیا۔

انہوں نے لکھا کہ ہریہان میں فطری طور پر ایک خاص دانائی موجود ہے اور انہیں اس صلاحیت پر مکمل بھروسا ہے، جو انہیں بے خوف بناتی ہے۔

سوزین خان نے بھی بیٹے کی میوزک ویڈیو پر ردعمل دیتے ہوئے اپنی جذباتی کیفیت کا اظہار کیا اور ہریہان کی اس کامیابی پر فخر کا اظہار کیا۔

ہریہان کی موسیقی کے نئے سفر پر صرف والدین ہی نہیں بلکہ خاندان اور قریبی دوستوں نے بھی بھرپور حمایت کی۔

ہریتھک روشن کی ساتھی اور خود ایک فنکارہ صبا آزاد نے گانا اپنے سوشل میڈیا اکاؤنٹ پر شیئر کرتے ہوئے ہریہان کو مبارکباد دی اور اس کی صلاحیتوں پر فخر کا اظہار کیا۔

سوزین خان کے ساتھی ارسلان گونی نے بھی گانے کی تعریف کرتے ہوئے بتایا کہ وہ اسے پورا دن سنتے رہے۔

ہریہان کے دادا اور معروف فلمساز راکیش روشن نے مختصر مگر محبت بھرے پیغام میں اپنے پوتے کو مبارکباد دی اور اسے مسلسل آگے بڑھتے رہنے کی دعائیں دیں۔

روشن خاندان میں موسیقی کی روایت بھی پرانی ہے۔ راکیش روشن کے بھائی اور معروف موسیقار راجیش روشن نے ہندی فلم انڈسٹری میں کئی یادگار موسیقی ترتیب دی ہے، جس کی وجہ سے موسیقی خاندان کی فنکارانہ میراث کا اہم حصہ رہی ہے۔

ہریتھک کی بہن سنینا روشن نے بھی اپنے بھتیجے کے لیے تفصیلی پیغام لکھتے ہوئے اس کی محنت اور کامیابی پر فخر کا اظہار کیا۔ انہوں نے ہریہان کے لیے مستقبل میں مزید کامیابیوں، محبت اور کامیاب مراحل کی خواہش ظاہر کی اور اس کی آواز اور گانے کو بے حد سراہا۔

ہریتھک روشن اور سوزین خان نے 2000 میں شادی کی تھی اور ان کے دو بیٹے ہریہان اور ہردھان ہیں۔ دونوں نے 2014 میں علیحدگی اختیار کرلی تھی۔

طلاق کے باوجود ہریتھک اور سوزین اپنے دونوں بیٹوں کی پرورش مشترکہ طور پر کرتے رہے ہیں اور ان کے درمیان خوشگوار تعلق برقرار ہے۔