بلوچستان؛ ساران تنگی میں سکیورٹی فورسز کی کارروائیاں، 6 دہشتگرد ہلاک

بلوچستان کے علاقے ساران تنگی میں سیکیورٹی فورسز کی کارروائیاں جاری ہیں اور تازہ آپریشن میں فتنۃ الہندوستان کے 6 دہشت گرد ہلاک ہوگئے جبکہ 9 ملزمان کو گرفتار کرلیا گیا۔

سیکیورٹی ذرائع کے مطابق سکیورٹی فورسز نے خفیہ اطلاعات پر فتنۃ الہندوستان کے دہشت گردوں کے خلاف کامیاب آپریشن کیا، ساران تنگی میں سیکیورٹی فورسز کی کارروائیوں کے دوران 9 مشتبہ افراد گرفتار کیے گئے ہیں۔

ذرائع نے بتایا کہ ہلاک فتنۃ الہندوستان کے دہشت گردوں کے قبضے سے بڑی مقدار میں اسلحہ اور گولہ بارود بھی برآمد کیا گیا۔

سیکیورٹی ذرائع نے بتایا کہ سیکیورٹی فورسز کی جانب سے دہشت گردوں کے خلاف کارروائیاں بدستور جاری ہیں، جو آخری دہشت گرد کے خاتمے تک جاری رہیں گی۔