پاکستان سے ون ڈے سیریزسے قبل انگلش ٹیم فٹنس مسائل میں الجھنے لگی

پاکستان کے خلاف میدان میں اترنے سے پہلے ہی انگلش ٹیم فٹنس مسائل میں الجھنے لگی، فاسٹ بولر ڈیوڈ ویلی ہاتھ پر چوٹ کھاکر ون ڈے سیریز سے باہر ہوگئے، ان کی جگہ جیک بال کو طلب کرلیا گیا، پیر کو کھلاڑی سائوتھمپٹن میں جمع ہوں گے۔


تفصیلات کے مطابق انگلینڈ اور پاکستان کے درمیان ون ڈے سیریز بدھ سے شروع ہورہی تاہم اس سے قبل ہی میزبان سائیڈ کو فٹنس مسائل نے اپنی لپیٹ میں لینا شروع کردیا ہے، لیفٹ آرم فاسٹ بولر ڈیوڈ ویلی ہاتھ کی تکلیف کے باعث پوری سیریز سے باہر ہوگئے ہیں، وہ ٹوئنٹی 20 بلاسٹ کے سیمی فائنل میں اس وقت انجری کا شکار ہوئے جب اپنے دوسرے اوور میں ڈرہم کے مارک اسٹونمین کی شاٹ کو روکنے کی کوشش کی، اگرچہ انھوں نے اپنے چاروں اوورز نہ صرف مکمل کیے بلکہ بیٹنگ اوپن بھی کی تاہم اس دوران درد کی شدت ان کے چہرے سے عیاں تھی۔

انگلینڈ اینڈ ویلز کرکٹ بورڈ کا کہنا ہے کہ اتوار کو ایکسرے میں ان کی انجری کی اصل نوعیت معلوم نہیں ہوسکی، اب وہ پیر کو مزید ٹیسٹ کرائیں گے جبکہ کنسلٹنٹ سے ان کے ہاتھ کا معائنہ بھی کرایا جائے گا۔ ویلی حالیہ کچھ عرصے میں انگلینڈ کی ون ڈے ٹیم کا لازمی جزو بن چکے ہیں، انھوں نے گذشتہ برس مئی میں انٹرنیشنل ڈیبیو کے بعد سے 18 ایک روزہ اور 11 ٹوئنٹی 20 میچز کھیل چکے ہیں، انھوں نے 27.82 کی ایوریج سے 29 ون ڈے وکٹیں لی ہیں، سری لنکا کے خلاف کارڈف میں انھوں نے کیریئر بیسٹ 34 رنز کے عوض 4 وکٹیں لی تھیں۔ان کی جگہ ٹیم میں اب جیک بال کو شامل کیا گیا ہے، یہ ان کی ایک روزہ سائیڈ میں پہلی طلبی ہے، گذشتہ ماہ انھوں نے پاکستان کے خلاف لارڈز میں ٹیسٹ ڈیبیو کیا تھا۔ انگلش ون ڈے ٹیم پیر کو سائوتھمپٹن میں یکجا ہوگی اور دو روز ٹریننگ کرے گی۔