روپے کے مقابل امریکی ڈالر کی قدر پھر بڑھنے لگی

 کراچی:  مقامی کرنسی کی قدر میں کمی کی افواہوں کے بعد امریکی ڈالر نے ایک بار پھر سراٹھا لیا ہے۔

اوپن مارکیٹ میں 2روز کے اندر ڈالر کی قدر 40 پیسے کے اضافے سے 107 روپے 40پیسے پر جا پہنچی جو منگل کو 107روپے تھی تاہم اس وقت ڈالر کے انٹربینک ریٹ 105روپے47 پیسے ہیں، 2روز قبل انٹربینک ریٹ 105 روپے 46 پیسے تھے۔

دوسری طرف برطانوی پاؤنڈ کی بھی قدر بڑھ گئی ہے، اوپن مارکیٹ میں گزشتہ روز پاؤنڈ کی قدر بڑھ کر 142روپے25 پیسے ہوگئی جو بدھ کو 142 روپے تھی جبکہ یورو کی قدر بھی 1روپے کے اضافے سے 127.75روپے ہوگئی جو بدھ کو 126.75 روپے تھی۔

واضح رہے کہ امریکی ڈالر کی قدر میں اضافے کے بعد گزشتہ ہفتے مرکزی بینک نے منی چینجرز کے ساتھ ہنگامی اجلاس طلب کیاتھا جس میں صورتحال پر غور کے بعد سینٹرل بینک نے روپے کی قدر میں کمی کا امکان مسترد کرتے ہوئے فاریکس ڈیلرز کو ضرورت پڑنے پر ڈالر فراہم کرنے کی یقین دہانی کرائی تھی تاہم رواں ہفتے ڈالر کی قدر میں پھر سے قیمتیں بڑھنے لگی ہیں اور ایک ہفتے کے اندر ڈالر کی قدر 40 پیسے بڑھ کر 107.4 روپے ہوگئی مگر انٹربینک مارکیٹ میں ڈالر کی قدر میں معمولی ردوبدل ہواہے۔