جیا پرادا نے بڑی اسکرین پرکم بیک کے لئے کئی کلو وزن کم کرلیا

ممبئی: ماضی کی سپراسٹار جیا پرادا ایک مرتبہ پھر بالی ووڈ میں قدم رکھنے کی تیاریاں کررہی ہیں اوراس کے لئے انہوں نے اپنا وزن کئی کلو کم کرلیا ہے۔

نئی دلی میں ایک تقریب کے دوران میڈیا سے بات کرتے ہوئے جیا پرادا نے کہا کہ انہوں نے کیرئیر کے عروج پر سیاست میں قدم رکھا۔ اپنی سیاسی مصروفیات کی وجہ سے اصلی جیا پرادا کہیں کھوگئی تھی لیکن وہ چاہتی ہیں انہیں لوگ پہلے ایک اداکارہ اورپھرسیاستدان کی حیثیت سے پہچانیں۔ اب وہ سمجھتی ہیں کہ دونوں کام ایک ساتھ کئے جاسکتے ہیں اس لئے انہوں نے ایک مرتبہ پھربڑی اسکرین پرجلوہ گرہونے کا فیصلہ کیا ہے۔

لیجنڈ اداکارہ کا کہنا تھا کہ انہوں نے یوگا، ورزش اورڈائیٹنگ کے ذریعے اپنے وزن میں کافی کمی کرلی ہے اوراب وہ آئندہ ماہ ایک فلم کی شوٹنگ میں بھی حصہ لیں گی۔