نواز الدین صدیقی کی فلم ’منٹو‘ کا ٹیزر جاری

 ممبئی: اُردو کے مقبول افسانہ نگار سعادت حسن منٹو کی زندگی پر مبنی فلم ’منٹو‘ کا ٹیزر جاری کردیا گیا۔

بھارتی میڈیا رپورٹس کے مطابق اُردو کے ممتاز ڈرامہ اور افسانہ نگار سعادت حسن منٹو کی زندگی پر بننے والی فلم ’منٹو‘ کا ٹیزر جاری کردیا گیا جس میں منٹو کا کردار معروف بالی ووڈ اداکار نواز الدین صدیقی سرانجام دے رہے ہیں۔

First day in #FestivalDeCannes with the much awaited #MantoTeaser #CannesWithManto https://t.co/mwbdJUB7Nv

— Nawazuddin Siddiqui (@Nawazuddin_S) May 12, 2018

نواز الدین صدیقی نے اپنے ٹوئٹر پر فلم کا ٹیزر جاری کرتے ہوئے بتایا کہ کانز فیسٹیول کے پہلے روز طویل عرصے سے منتظر فلم ’منٹو‘ کا ٹیزر اب جاری کردیا گیا ہے۔

نندیتا داس کی ہدایت کاری میں بننے والی اس فلم  کے ٹیزر میں آزادی کے بعد غربت اور کرپشن سے گھرے ملک کی کہانی بیان کی گئی ہے جس میں نواز الدین صدیقی نے ایک ایسے باغی طبیعت کے مصنف کا کردار ادا کیا ہے جو کسی کے سامنے سچ کہنے سے نہیں ڈرتا اور معاشرے کے مسائل کو کہانی کی شکل میں ڈھالتا ہے جس کی وجہ سے اسے عدالت کا بھی سامنا کرنا پڑتا ہے۔