وزیر اعظم عمران خان کی افغانستان کو پہلا ٹیسٹ میچ جیتنے پر مبارکباد

 اسلام آباد: وزیراعظم عمران خان نے افغانستان کرکٹ ٹیم کو ٹیسٹ کرکٹ میں پہلی جیت پر مبارک باد دی ہے۔

سماجی رابطے کی ویب سائٹ ٹویٹر پر وزیراعظم عمران خان نے افغانستان کو ان کی ٹیم کے پہلے ٹیسٹ کرکٹ میچ کی جیت پر مبارکباد دیتے ہوئے کہا ہے کہ بین الاقوامی کرکٹ میں قدم رکھنے کے بعد تھوڑے ہی عرصے میں افغان کھلاڑیوں نے یہ زبردست کامیابی سمیٹی ہے۔

Congratulations to Afghanistan on their team's first ever win in test cricket. The Afghan cricketers have achieved amazing successes in such a short period of their exposure to international cricket.

— Imran Khan (@ImranKhanPTI) March 18, 2019

عمران خان نے ٹویٹر پر پہلے انگریزی پھر اردو اور پھر پشتو زبان میں مبارکباد دی۔

افغانستان کرکټ ټیم تہ پہ لومړي ځل ټسټ ګټلو مبارکي ورکوم. د افغانستان کرکټ لوبغاړو نړیوالې کرکټ کي دومره لږ وخت کې بریالیتوبونه ترلاسه کړي دي.

— Imran Khan (@ImranKhanPTI) March 18, 2019

واضح رہے کہ افغانستان کی کرکٹ ٹیم نے بھارتی شہر دہرہ دون میں آئرلینڈ کو 7 وکٹوں سے شکست دے کر ٹیسٹ میں اپنی پہلی کامیابی حاصل کی۔ قبل ازیں انگلینڈ اور پاکستان کی کرکٹ ٹیمیں اپنے اپنے دوسرے ٹیسٹ میں کامیابی حاصل کرچکی ہیں جب کہ آسٹریلیا واحد ٹیم ہے جس نے اپنے پہلے ہی میچ میں کامیابی حاصل کی۔

افغانستان کو ٹیسٹ کرکٹ میں اسکی ٹیم کی پہلی جیت مبارک۔ بین الاقوامی کرکٹ میں قدم رکھنے کے بعد تھوڑے ہی عرصے میں افغان کھلاڑیوں نے یہ زبردست کامیابی سمیٹی ہے۔

— Imran Khan (@ImranKhanPTI) March 18, 2019

اپنا پہلا ٹیسٹ میچ جیتنے میں ویسٹ انڈیز کا نمبر پانچواں ہے جس نے اپنے چھٹے میچ میں لارڈز کے تاریخی میدان میں انگلینڈ کے خلاف پہلی جیت سمیٹی۔

زمبابوے نے اپنے 11 ویں ٹیسٹ میچ میں پہلی کامیابی پاکستان کے خلاف حاصل کی، جنوبی افریقا نے اپنے 12 ویں میچ میں انگلینڈ کو مات دے کر پہلا ٹیسٹ جیتا، سری لنکا کو 14 ویں میچ میں بھارت کے خلاف کامیابی ملی اور بھارت کو 25 میچوں کے انتظار کے بعد انگلینڈ کے خلاف پہلی کامیابی حاصل ہوئی۔

اسی طرح  بنگلہ دیش کو 35 میچز کے بعد پہلی کامیابی زمبابوے کے خلاف ملی جب کہ دور حاضر کی بہترین کرکٹ ٹیم نیوزی لینڈ کو اپنی پہلی جیت حاصل کرنے میں 45 ویں میچ تک انتظار کرنا پڑا۔ اسے پہلی جیت ویسٹ انڈیز کے خلاف حاصل ہوئی۔