کویت سٹی: کویت کی نیشنل پیٹرولیم کمپنی میں جمعے کے روز آتشزدگی کا واقعہ پیش آیا، جس میں دو ایشیائی ملازم جاں بحق ہوگئے۔
کویت نیشنل پیٹرولیم کمپنی (کے این پی سی) کی جانب سے جمعے کے روز واقعے سے متعلق بیان جاری کیا گیا جس میں بتایا گیا ہے کہ منال ال احمدی آئل ریفائنری پلانٹ پر ہونے والی آتشزدگی میں دو ایشیائی ملازمین جاں بحق جبکہ 5 زخمی ہوئے جن میں سے تین کو تشویشناک حالت میں ال عدن اسپتال منتقل کیا گیا ہے۔
اس واقعے میں زخمی ہونے والے دیگر دو ملازمین کو کمپنی کے اسپتال میں طبی سہولیات فراہم کر کے گھر روانہ کردیا گیا ہے۔
کمپنی کے مطابق جاں بحق ہونے والے دونوں ملازمین جائے وقوعہ پر اپنی معمول کی ذمہ داریاں انجام دے رہے تھے۔
تواجد وزير النفط د.محمد الفارس، والرئيس التنفيذي لمؤسسة البترول الكويتية بالوكالة وفاء الزعابي والرئيس التنفيذي لـ “البترول الوطنية” وليد البدر وعدد من قيادات الشركة على الفور في موقع الحريق لمتابعة جهود السيطرة عليه ميدانيا، وللاطمئنان عن قرب على سلامة العاملين. pic.twitter.com/mSKkBz7uiP
— البترول الوطنية | KNPC (@KNPCofficial) January 14, 2022
کے این پی سی نے تصدیق کی ہے کہ واقعے کے بعد ایکسپورٹ آپریشن کو بند کردیا گیا ہے۔ آخری موصول ہونے والی اطلاعات کے مطابق محکمہ فائر بریگیڈ نے آگ پر قابو پالیا اور کولنگ کا عمل جاری تھا۔
اس سے قبل مشینوں کی مرمت کے دوران بھی ریفائنری میں آتشزدگی کا واقعہ پیش آیا تھا، جس میں 10 ملازم جھلس کر زخمی ہوئے تھے۔ العربیہ کی رپورٹ کے مطابق یہ ریفائنری یومیہ 25 ہزار بیرل تیل ریفائن کرتی ہے، جس سے مقامی مارکیٹ کی طلب پوری کی جاتی ہے۔