پاک فوج نے فیلڈ مارشل عاصم منیر کی صدر بننے کی خبروں کو جھوٹ قرار دے دیا
معرکہ حق کے بعد فیلڈ مارشل سید عاصم منیر کے صدر بننے کی باز گشت کے حوالے سے ڈی جی آئی ایس پی آر لیفٹیننٹ جنرل احمد شریف چوہدری نے دو ٹوک ردعمل دیا ہے۔
دی اکانومسٹ کو خصوصی انٹرویو میں ڈی جی آئی ایس پی آر نے فیلڈ مارشل سید عاصم منیر کی صدر بننے کی خبروں کو جھوٹ قرار دے دیا۔
ڈی جی آئی ایس پی آر نے معرکہ حق کے بعد کیے جانے والے سیاسی تجزیے مسترد کرتے ہوئے کہا کہ ’’فیلڈ مارشل سید عاصم منیر کے بارے میں پاکستان کے صدر بننے کی باتیں مکمل طور پر بے بنیاد ہیں۔‘‘
دی اکانومسٹ نے سوال کیا کہ پاکستان، بھارتی فوجی کارروائی پر کیا ردعمل ظاہر کرے گا؟ جس پر ڈی جی آئی ایس پی آر نے جواب دیا کہ ’’ہم اس بار ہندوستان کے مشرق سے آغاز کریں گے۔‘‘
ڈی جی آئی ایس پی آر نے واضح کیا کہ ’’اس کی شروعات بھارت کے اندر گہرائی سے حملہ کرنے سے ہوگی اور بھارت کو یہ سمجھنے کی ضرورت ہے کہ وہ بھی ہر جگہ مارے جا سکتے ہیں۔‘‘