کراچی؛ آتشزدگی سے متاثرہ گل پلازہ کو سیل کرنے کا عمل شروع

ایم اے جناح روڈ پر واقع گل پلازہ کی عمارت کو سیل کرنے کا عمل شروع ہوگیا، عمارت 9 روز قبل آتشزدگی سے شدید متاثر ہوئی تھی۔

آتشزدگی کے دوران گل پلازہ کا 40 فیصد منہدم ہوگیا تھا جبکہ عمارت کے بقیہ حصے کی حالت انتہائی مخدوش ہوچکی ہے۔

کے ایم سی کے عملے نے گل پلازہ کے اطراف لوہے کی شٹرنگ لگانے کے لیے کھڈے کرنا شروع کر دیے، عمارت کو پلاسٹک کی گرین جالی لگا کر بند کیا جائے گا۔

دوسری جانب، ٹیکنیکل ٹیم بھی عمارت کا جائزہ لینے پہنچ گئی۔

سانحہ گل پلازہ میں اب تک جاں بحق افراد کی تعداد 73 تک پہنچ چکی ہے جبکہ 79 افراد اب بھی لاپتا ہیں۔

ذرائع کا کہنا ہے کہ گل پلازہ میں ابتدائی تحقیقات میں آگ بیسمنٹ میں لگنا رپورٹ ہوا، گل پلازہ میں سرچ اینڈ ریسکیو ٹیموں نے معائنہ مکمل کر لیا جس کے مطابق گل پلازہ کی بیسمنٹ میں موجود دروازوں پر تالے لگے ہوئے تھے۔

ذرائع کے مطابق ریسکیو ٹیموں نے ویڈیوز اور دیگر شواہد سے اعلیٰ حکام کو آگاہ کر دیا۔

اعلیٰ حکام کے مطابق گل پلازہ میں آگ 17 جنوری کی شب لگی تھی، گل پلازہ کی آگ سے 1200 دکانیں متاثر ہوئیں اور ایک حصہ زمین بوس ہوا، پلازہ کو آج سیل کرکے مسمار کرنے کا آپریشن شروع کیا جائے گا۔

جاوید نبی کھوسو نے بتایا کہ سانحہ گل پلازہ میں جاں بحق افراد کی تعداد 73 اور لاپتا ہونے والے افراد کی تعداد 79 ہے، اب تک 55 افراد کے لواحقین نے ڈی این اے نمونے جمع کروائے ہیں

ڈی سی ساؤتھ کا کہنا تھا کہ چند لواحقین کے تین، تین یا چار، چار لوگ بھی شامل ہیں۔ اب تک جاں بحق 23 افراد کی شناخت کا عمل مکمل کر لیا گیا۔