افغانستان میں نجی ٹی وی چینل پر حملے میں خاتون ہلاک، نشریات بند

کابل: افغان دارالحکومت میں مقامی چینل پر نامعلوم مسلح افراد نے حملہ کرکے چینل کی نشریات بند کرادیں۔

غیرملکی خبررساں ادارے کے مطابق افغانستان کے دارالحکومت کابل میں ایک مقامی ٹی وی چینل شمشاد پر حملہ ہوا ہے جس میں اب تک ایک خاتون کی ہلاکت کی تصدیق ہوچکی ہے جب کہ متعدد افراد زخمی ہیں۔ چینل کی انتظامیہ نے سماجی رابطے کی ویب سائٹ ٹویٹر پر حملے کی اطلاع دی اور حملے میں زخمی ہونے والے عملے کی حفاظت کے لئے دعاؤں کی اپیل بھی کی ہے۔

Breaking News
Pray for shamshad Television Employees. pic.twitter.com/K1s3IE6mft

— Shamshad Tv (@Shamshadnewstv) November 7, 2017

کابل پولیس چیف کے مطابق حملہ آوروں نے دستی بموں اور خود کار ہتھیاروں سے حملہ کیا جس کے بعد ٹی وی کی نشریات بند کردی گئیں۔ واقعے کی اطلاع ملتے ہی فورسز پہنچ گئی اور کارروائی کرکے ایک حملہ آور کو ہلاک کردیا اور عمارت کا کنٹرول حاصل کرنے کی کوشش کی جارہی ہے تاہم دہشت گردوں کی جانب سے مزاحمت کا سامنا ہے اور تاحال فائرنگ کا تبادلہ بھی جاری ہے۔

Breaking News
Attackers target Shamshad TV station in #Kabul, TV's staffer reports several casualties from inside the building..

— Shamshad Tv (@Shamshadnewstv) November 7, 2017

پولیس چیف کا کہنا ہے کہ ہلاکتوں یا حملہ آوروں دونوں کی تعداد کے بارے میں ابھی کچھ  بھی کہنا قبل از وقت ہے جب کہ واقعے کی ذمہ داری داعش نے قبول کرلی ہے۔