- سندھ کابینہ، گاڑیوں کی پریمیم نمبر پلیٹس متعارف کرانیکا فیصلہ
- لاہور؛ نوبیاہتا دلہن کی فلیٹ سے پھندا لگی لاش برآمد
- آئی ایم ایف مشن کی آمد سے قبل بجٹ اہداف مکمل کرنے کا فیصلہ
- تجارتی خسارے میں 17 فیصد کمی، برآمدات میں 9.10 فیصد بڑھیں
- پاکستان کا پہلا قمری خلائی مشن آج چین سے لانچ ہوگا
- میگا ایونٹ سے قبل پاکستانی بالنگ لائن کی تعریفیں ہونے لگیں
- مکارم اخلاق
- مستحکم ازدواجی زندگی مگر کیسے۔۔۔۔۔!
- کوہلی کو پیچھے کیوں چھوڑا، بھارتی شائقین گائیکواڈ کے دشمن بن گئے
- اے این ایف کارروائیوں میں 2 ٹن سے زائد منشیات برآمد
- ریپ کیس، لامی چینی بے گناہ ہونے کی پھر دہائی دینے لگے
- احسان اللہ کے کیریئر سے کھلواڑ کی تصدیق ہوگئی
- پشین میں پولیس پر فائرنگ، ڈی ایس پی اور ایس ایچ او زخمی
- شاہراہ قراقرم پر بس کھائی میں گرنے سے 20 مسافر جاں بحق، 21 زخمی
- یوٹیوبر نے دنیا کا سب سے بڑا ریموٹ کنٹرول جہاز تیار کرلیا
- بلوچستان؛ مختلف علاقوں میں علی الصبح زلزلے کے جھٹکے
- واٹس ایپ کا صارفین کیلئے نئے فیچر پر کام جاری
- پھلوں، سبزیوں پر مشتمل غذائیں پروسٹیٹ کینسر میں مفید قرار
- آپ اپنی آئینی حدود جانتے ہیں مگر تجاوز کئی گنا زیادہ ہوتا ہے، مولانا فضل الرحمٰن
- فیصل آباد میں شوہر نے دو بیویوں اور چار بچوں کو قتل کر کے خودکشی کرلی
حسن ناصر سے ارشد شریف تک
محفوظ انسانی تاریخ میں غالباً سقراط ہی وہ پہلا شخص ہے جس نے اپنے افکار سے روگردانی قبول نہیں کی اور بڑھ کر موت کو گلے لگا لیا۔ دیکھا جائے تو تب سے اب تک دنیا کے شاید ہر خطے اور ہر قوم میں ایسے لوگ پیدا ہوتے رہے ہیں جنھوں نے اس روایت کی پاسداری کرتے ہوئے اسے آگے بڑھایا اور اپنی مثال سے ثابت کیا کہ وہ ایک لمحے کو مر کر ہمیشہ کے لیے زندہ ہوگئے ہیں۔
یہ فہرست اتنی لمبی ہے کہ یہ کالم اس کے اندراج کا متحمل نہیں ہوسکتا، اس لیے میں اس میں سے صرف دو ایسے بہادر انسانوں کا ذکر کروں گا جن کا تعلق براہ راست ہم سب کے وطنِ عزیز سے ہے اور جن کی وجہ سے انسانی کردار کی عظمت کا وہ نقش صورت پذیر ہوا جس میں اپنے عقیدے، نظریے اور مشن سے کمٹ منٹ کے دو عظیم منظر ہم سب نے دیکھے۔
میری مراد ساٹھ سال قبل لاہور کے شاہی قلعے میں بے پناہ تشدد کی وجہ سے جان دینے والے حسن ناصر سے ہے جن کی انقلابی جدوجہد اور انسانی حقوق کی پاسداری کے جنون نے نہ صرف ایک تاریخ رقم کی بلکہ روسی انقلاب سے دنیا بھر میں پیدا ہونے والی انقلابی تحریکوں کا ایک روشن تر استعارہ بھی بن گئے جب کہ حال ہی میں بعض مقدمات کے باعث وقتی طور پر ملک چھوڑنے اور پھر پراسرار حالات میں افریقہ کے ملک کینیا میں جسمانی تشدد کے بعد شہید کیے جانے والے ارشد شریف ایک ایسے صحافی اور ٹی وی اینکر تھے جنھوں نے اپنے منصب اور فکر سے وفاداری نبھاتے ہوئے جان دینا تو قبول کرلیا مگر ظلم سے سمجھوتہ نہیں کیا اور اپنی شہادت سے ایک ایسے عوامی ردعمل کو کھل کر احتجاج کی تحریک دی جو گوناگوں وجوہات کے باعث برسوں سے غفلت کی نیند میں تھا۔
حسن ناصر کی زندگی کو تو قرۃ العین حید ر جیسی بے مثال مصنفہ نے اپنے ایک شاندار ناولٹ ’’ہاؤسنگ سوسائٹی‘‘ میں ہمیشہ کے لیے محفوظ کر دیا، آج کے لکھنے والوں میں مستنصر حسین تارڑ کے سوا مجھے کوئی اور اس کا اہل نظر نہیں آتا جو ارشد شریف کی اس شاندار قربانی کو زبان دے سکے۔ امید ہے کہ وہ اس طرف توجہ دیگا۔
اب اس تصویر کا ایک دوسرا رُخ بھی ہے جو بوجوہ بہت تکلیف دہ ہے کہ دنیا ایسے لوگوں کی موت پر عموماً ماتم تو بہت کرتی ہے لیکن بہت جلد انھیں بھول کر پھر سے اپنے ہنگاموں میں گم ہوجاتی ہے اور آہستہ آہستہ یہ لوگ صرف الماریوں میں بند کتابوں تک محدود ہو جاتے ہیں البتہ ایک اچھی بات یہ دیکھنے میں آتی ہے کہ اب کئی چینل ان غیرمعمولی افراد کی پیدائش یا موت کے حوالے سے نہ صرف لوگوں کو آگاہ کرتے ہیں بلکہ کبھی کبھی اُن کے لیے خصوصی پروگرام بھی ترتیب دیتے ہیں۔ میں نے ان خواب گر دیدہ وروں پر ایک نظم لکھی ہے مگر اُس سے پہلے اُس عمومی بے حسی اور فراموشی کا تذکرہ ضروری ہے جو میرے نزدیک کسی لمحۂ فکریہ سے کم نہیں۔
وہ جو اپنی جاں سے گزر گئے
یہ جو بجھتے ہی چلے جاتے ہیں
قریٔہ یاد کے طاقوں میں چراغ
کون روکے گا انھیں!
یہ جو اس بڑھتی ہوئی رات سے لڑنے کے لیے
جان سے اپنی گزر جاتے ہیں
کون دیکھے گا انھیں!
کس طرح وحشی ہواؤں سے انھیں بچنا ہے
کسی طرح ان کو بچایا جائے
کس طرح ان کی شہادت کا سبق
جاگتے درد کی تحویل میں لایا جائے!
ان کو دو چار گھڑی رو کے دکھانے کے سوا
کچھ بھی تو پاس نہیں
ان کی آنکھوں میں جو روشن تھا ہمارا کل تھا
یہ بھی احساس نہیں
کام تو کام ہے اس دہرکے ہنگاموں میں
نام بھی اُن کے ہمیں یاد نہیں رہتے ہیں
اُن کے رستے پہ نہیں چلتے کبھی ایک قدم
بے جہت شام و سحر بیتے چلے جاتے ہیں
اس بھرے شہر میں رسوائی کا خاموشی سے
زہر بھی پیتے چلے جاتے ہیں
ان کا پیغام تھا عزت کے لیے مر جانا
اور ہم جیتے چلے جاتے ہیں
ممکن ہے اس صورتحال کے بیان میں کچھ مبالغہ در آیا ہو مگر سخن فہم احباب اچھی طرح جانتے ہیں کہ کسی جذباتی تاثر کے بیان میں دل اور قلم دونوں قابو سے باہر ہوجاتے ہیں اور اب آخر میں اپنے ضمیر کی حفاظت کے لیے دنیا بھرمیں جان دینے والے ان شہیدوں اور مشاہدے اور تحقیق سے زندگی اور کائنات کے اصولوں کو دریافت کرنے والے تابغوں کے لیے ایک نظم:
کہاں گئے وہ خواب گر
کہاں گئے وہ خواب گر
جو درد سے بھری ہوئی شبوں میں جاگ جاگ کر
تراشتے تھے خواہشوں کے خوش نما درخت سے
اک ایسا گھرکہ جو کہیں
پہ تھا بھی اور نہیں بھی تھا
کہ جن کے فن کی روشنی
دل و نظر میں پھیل کر کچھ ایسے جاوداں ہوئی
زماں مکاں سے ماورا
اک اور جہان میں کچھ اس طرح رواں ہوئی
کہ بے نشان زندگی کچھ اور بے نشاں ہوئی
کہاں گئے وہ دیدہ ور
کہ جن کی چشمِ دل کشا میں علم سے بہار تھی
وہ عرش کا فراز ہو یا خاک کی ہو پستیاں
یقین ہی یقین تھا اور کہیں گماں نہ تھا
اُن سے کچھ نہاں نہ تھا
جہاں پہ جو بھی راز تھا وہ اُس کو فاش کرگئے
چھپے ہوئے اصول جن سے چل رہی تھی زندگی
انھیں تلاش کرگئے
فضاں کہ اب وہ خواب گر
بنا رہے ہیں گھر مگر
کہیں بھی ان میں اُن کے خواب دور دور تک نہیں
فغاں کہ اب وہ دیدہ وَر
یوں حب زر میں کھو گئے
کہ اب وہ سب ہیں کھو چکے وہ علم جس میں شک نہیں
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔