قیصر محمود گورائیہ‘ پنجابی اسلوب کا تازہ کار شاعر

ماں بولی دا بوٹا سِر تے گڈنا اے

سوچاں دا میں اِنج بُھلیکھا کڈھنا اے

شعراں راہیں اک اک بول پنجابی دا

جگ تے عام میں قیصرؔ کر کے چھڈنا اے

پنجابی غزل کا کینوس بہت وسیع ہو چکا ہے۔ آج کی پنجابی غزل انسان اور معاشرے کی پوری طرح سے عکاسی کر رہی ہے۔ پنجابی زبان کا تسلسل صدیوں پر پھیلا ہوا ہے۔

پنجابی زبان کے بے شمار شعراء نے اپنی سرزمین پر علم وادب، انسان کی اساس، فکری زاویوں، وطنیت، محبت، سماجی قدروں، کائناتی اسرار اور انسانیت کی تعلیم جیسے روشن پہلوؤں کی ترجمانی کی ہے۔پنجابی زبان عرصہ دراز سے شاعری سے مالا مال ہے، آج کا شاعر بھی اپنی شعری فکر کی بدولت انسانیت اور پیار محبت کا درس دے رہا ہے ،جن میںقیصر محمود گورائیہ کی غزل کا بنیادی موضوع آج کا انسان اور دُکھ ہے۔

دُکھ بھی کئی طرح کے ہوتے ہیں، جو دل میں پلتے، روح میں کھلتے، بدن میں پھیلتے، آنکھوں سے چھلکتے، قطرہ قطرہ آنکھوں سے پگھلتے ہیں تو کہیں معاشی مسائل کے دُکھ، تو کہیں معاشرتی نا ہمواریوں کے، کبھی سو طرح کی نفسیاتی الجھنیں تو کہیں سیاسی عوامل میں الجھنے کے دُکھ، ایسے بے شمار دکھوں کو ایک گٹھڑی میں سمیٹ کر قیصر محمود گورائیہ اپنے پنجابی شعری مجموعہ ’’لُوں لُوں رچیاں پیڑاں‘‘کے ذریعے ہم تک پہنچاتے ہیں۔

اس کتاب کو ’’سوہنا تے سُلکھنا غزل پراگا‘‘ تسلیم کرنے پر محمد اقبال نجمی لکھتے ہیں کہ ’’قیصر پنجابی شاعری دے حوالے نال اپنی نویکلی پچھان رکدا اے۔ اوہدے ادبی پندھ اُتے جھاتی مرئیے تے سانوں اوہدیاں لکھتاں وچ سادگی تے سہپن دے چاننے لاٹاں مار دے نظریں آؤندے نیں۔ اوہ پنجاب دی سو ہنی ستھری فضا وچ حیاتی گزارن والا منکھ اے تے اوہدے وچاراں وچ وی خلوص، وفا، احساس تے پیار دا چانن لبھدا اے۔ اوہنے جہڑی صنف وچ شعر الیکے اوہدے وچ اپنی رہتل اپنی وسوں تے اپنے ہوند دی گل کیتی اے۔ پیار جذبیاں دا اظہار وی اوہ کھل ڈھل کے کردا اے۔‘‘

قیصر محمود گورائیہ کا شمار پنجابی کے جدید اور جواں فکر شعراء میں ہوتا ہے۔ جن کی شاعری کا مرکز و محور انسان اور معاشرتی نظام کے تضادات، زندگی کی تلخیوں، حالات کی سنگینیوں، بے ثباتی، بے یقینی، خوف، فساد ، ہزاروں خواہشوں کے خواب رسوا ہوتے ہوئے بگڑتے حالات و واقعات کے جبر کا منظر نامہ ہے۔ وہ سچی بات پر یقین رکھنے اور برملاسچ کا ساتھ دینے میں عار نہیں کرتے، انھیں جھوٹ سے شدید نفرت ہے کیونکہ وہ ایک سچا تخلیق کار ہے جس کے لفظ اُس کے ہونے کی گواہی یوں دیتے ہیں۔

سوچ لے قیصرؔ مونہوں کڈھن توں پہلاں

کر لیے جے گل ویا ہنی پیندی اے

’’لُوں لُوں رچیاں پیڑاں‘‘ ان کا اولین شعری مجموعہ ہے جو پنجابی غزلوں پر مشتمل ہیں۔ جس میں ان کی فکری اور فنی پختگی کا ثبوت ملتا ہے۔ قیصر اپنے اسلوب کے تازہ کار شاعر ہے۔ ڈاکٹر صغریٰ صدف کے خیال کے مطابق ’’قیصر محمود گورائیہ اپنے سلوب دا سوہنا شاعر اے۔ نکی گل نوں وڈا کر کے پیش کرنا خوب جاندا اے۔ ایہنوں زبان دیاں بریکیاں دا وی پتہ اے تے پنجابی ادبی ورثے دا وی ادراک اے۔ ایسے واسطے سادہ موضوع وچ وی رنگ بھر دیندا اے۔ ایہنوں اپنی گل کہن دا ول آوندا اے۔‘‘

قیصر کی پنجابی غزل میں تخیل کی رنگینی ،خیالات کی دلکشی جا بجا ملتی ہے۔ان کے کلام میں سلاست اور روانی ہے ، وہ مشکل لفظوں کو نہ صرف استعمال کرنے سے گریز کرتے ہیں بلکہ آسان ردیف، کافیوں کو چھوٹی بحر میں خوب برتنے پر بھی دسترس رکھتے ہیں۔ ایسے میں ان کے چند اشعار ملاحظہ کیجیے :

ککھاں ورگی دولت دے لئی وچ پردیساں

لکھاں ورگا دیس گوا کے بیٹھے آں

……

مرا بھار قیصرؔ ونڈاوے گا کہڑا

میں کلہ تے سر تے زمانے دا دُکھ اے

’’لُوں لُوں رچیاں پیڑاں‘‘ میں شامل غزلوں میں ایسے بہت سے اشعار پڑھنے کو ملتے ہیں جو ان کی حقیقی زندگی کے ترجمان ہیں، جن میں ان کی سچائی اور ان کی ذ ہنی، قلبی کیفیات کا تاثر ملتا ہے، وہ جہاں سر پر زمانے کے دُکھوں کا بوجھ اُٹھائے ہوئے ہیں، وہیں مقبوضہ کشمیر کی عوام پر ظلم و ستم ہوتا دیکھ کر اشک بار آنکھوں میں آزادی کا سورج طلوع ہونے کا خواب دیکھنے پر پُراُمید نظر آتے ہیں۔

آزادی دا سورج کِسلے چڑھنا اے

وچ کشمیر دے فجراں سُکنے پئیاں نیں

قیصرؔ آپو اپنی جان بچاون لئی

ظلماں اگے نسلاں سُکنے پئیاں نیں

قیصر محمود گورائیہ مفادات کی روشنی سے پاک دکھائی دیتے ہیں، وہ اپنے پنجابی کلام کی بدولت دلوں میں محبت کی روشنی کرنے کا عزم رکھتے ہیں۔

ان کے کلام میں پنجاب کی ثقافت کے حقیقی رنگ نمایاں ہیں، انھی رنگوں میں کہی صوفیانہ رنگ بھی دیکھنے کو ملتا ہے۔ بابا گنج شکرؒ، بابا بُلھے شاہؒ، شاہ حسینؒ، سلطان باہوؒ، غلام فریدؒ، میاں محمد بخشؒ اور وارث شاہؒ و دیگر صوفی شعراء سے خوب استفادہ کیے ہوئے ہیں۔ اس کتاب کا خوبصورت آغاز حمد باری تعالیٰ سے کیا گیا ہے۔

’’چپہ چن تے مٹھ کُو تارے‘‘ آپ کھلارے کلے کارے

کِھلرے پُلرے تھاؤں تھائیں فیر سوارے کلّے کارے

جِن، انسان، چرند، فرشتے نالے کل مخلوقاں

کمے لائے کمی سارے اٹھے پاہرے کلے کارے

’’لُوں لُوں رچیاں پیڑاں‘‘ کے علاوہ ان کے دیگر شعری مجموعوں میں جد وچھڑے ساں، رُتاں پرت پئیاں،دو چڑیاں بولدیاں اور ’’نیوندرا‘‘ شامل ہیں۔

ولیم ورڈ زورتھ اور جان کیٹز جیسے انگریزی شاعروں کا خوب مطالعہ کرنے پر بھی وہ اپنی مادری زبان سے رشتہ ترک نہ کر سکیں بلکہ اپنی ماں بولی زبان پنجابی میں شعر کہنے اور محبت کا درس دینے کی طرف راغب ہوئے۔المختصر قیصر محمود گورائیہ نے اپنے منفرد شعری اسلوب سے پنجابی غزل کوایک نئی پہچان دی ہے۔ ان کی شاعری کی جس قدر تعریف کی جائے کم ہے۔