وزیراعظم کی بنوں آمد پرتعلیمی اداروں کی بندش پرعمران خان برہم

 اسلام آباد: پاکستان تحریک انصاف کے چئیرمین عمران خان کا کہنا ہے کہ تعلیم و تربیت کو سیاست کی بھینٹ چڑھانے کی اجازت نہیں دی جا سکتی،سیاست کے لئے طلبا کو تعلیم سے محروم کرنے کا کلچر ختم کرنے کی ضرورت ہے.

پاکستان تحریک انصاف کے چئیرمین عمران خان نے سماجی رابطے کی ویب سائٹ ٹوئٹر پر اپنی ٹوئٹ میں وزیر اعظم کی بنوں آمد کے موقع پر تعلیمی اداروں کی بندش پرشدید برہمی کا اظہار کیا اور کہا کہ تعلیم و تربیت کو سیاست کی بھینٹ چڑھانے کی اجازت نہیں دی جا سکتی۔ انہوں نے خیبرپختونخوا حکومت کو ہدایت کی کہ آئندہ کسی بھی پی سی آئی شخص کے دورے کے موقع پر تعلیمی ادارے بند نہ کئے جائیں،خیبرپختونخوا سے اس بدترین رسم کے خاتمے کا آغاز کریں گے جب کہ بچوں کی تعلیم و تربیت پرکسی قسم کی قدغن برداشت نہیں کریں گے۔

Closing educational institutions when VIPs visit an area is a retrogressive practice. I have asked KP govt to immediately put a stop to it.

— Imran Khan (@ImranKhanPTI) May 3, 2016

دوسری جانب پشاور میں یوتھ گیمزکی  افتتاحی تقریب سے خطاب کرتے ہوئے عمران خان کا کہنا تھا کہ کھیل انسان کو مقابلہ کرنا سکھاتا ہے سیاست میں آنا بھی ایک مقابلہ ہے اورمیں نے  20 سالہ سیاست کے اس مقابلے میں نہ ہار مانی ہے اور نہ آئندہ کبھی مانوں گا، اچھا کھلاڑی ہار سے ڈرتا نہیں بلکہ خامیاں دور کرکے نئی قوت اور جذبے کے ساتھ سامنے آتا ہے اور آپ کو پتہ ہے کہ میرا مقابلہ کس کے ساتھ ہے، ہرچیمپئن پر برا وقت بھی آتا ہے اور وہ ہارتا بھی ہے لیکن ہارکے بعد اپنا جائزہ لینا چاہئے۔

چیئرمین تحریک انصاف کا کہنا تھا کہ خیبرپختونخوا میں سب سے زیادہ پیسہ تعلیم پرخرچ کیا گیا جب کہ وزیراعظم مانسہرہ میں آئے تو کالج یونیورسٹی بند کردئے گئے اور آج بنوں میں بھی تعلیمی ادارے بند کئے گئے جس کی شدید الفاظ میں مذمت کرتا ہوں اور جن لوگوں نے تعلیمی ادارے بند کئے ان کے خلاف کارروائی بھی کی جائے گی۔