پاکستان کے 70 سالہ لوہار نے گنیز ورلڈ ریکارڈ بنادیا

 کراچی: پاکستان کی تاریخ میں 70 سالہ لوہار نسیم الدین نے ورلڈ ریکارڈ بنا ڈالا۔

انہوں نے ایک ہاتھ سے مٹھی میں سیب توڑنے کے مقابلے میں انگلینڈ کو شکست دی اور 13 کے مقابلے میں 18 سیب توڑ ڈالے۔ اس طرح وہ گنیز ورلڈ ریکارڈ بنا نے والے پاکستان کی تاریخ کے سب سے بوڑھے شخص بن گئے، گنیز ورلڈ ریکارڈ نے ان کا ریکارڈ منظور کر لیا اور تصدیقی ای میل بھی موصول ہوگئی جبکہ ریکارڈ کی تفصیلات ویب سائٹ پر بھی جاری کردیں گئیں۔

گینز ورلڈ ریکارڈ کی سالگرہ کے حوالے سے پوری دنیا میں خصوصی طور پر ورلڈ ریکارڈ توڑنے کا سلسلہ جاری رہا۔ کراچی سے تعلق رکھنے والے لوہار 70 سالہ نسیم الدین کو بھی خصوصی اجازت دی گئی۔

نسیم الدین 45 سال سے ویلڈنگ کے کام سے وابستہ ہیں۔ وہ لوہے کے گیٹ اور کھڑکی دروازے بنانے کا کام کرتے ہیں ، انہوں نے گنیز ورلڈ ریکارڈ میں نام درج کر وا کر ایک نئی تاریخ رقم کر دی اور انگلینڈ کے ڈونی بیکسٹر کے ایک منٹ میں 13 سیب توڑنے کے ریکارڈ کو 18 سیب توڑ کر اپنے نام کر لیا۔

نسیم الدین کا کہنا ہے کہ ساری زندگی لوہے کے ساتھ کام کیا ہے اس لیے ہاتھ بھی لوہے کا ہی ہو گیا ہے،خواہش تھی کہ میں پاکستان کا نام روشن کروں،اللہ کا شکر ہے کہ اس میں کامیابی ملی۔

واضح رہے کہ نسیم الدین پاکستان کے لیے ماشل آرٹس میں پوری دنیا میں سب زیادہ 73 عالمی ریکارڈ بنانے والے محمد راشد کے والد ہیں۔ ان کی پوتی بھی صرف 7 سال کی عمر میں ورلڈ ریکارڈ بنا چکی ہیں۔ نسیم الدین نے اپناعالمی ریکارڈ پاکستان کرکٹ ٹیم کے نام کردیا۔