غیر قانونی قبضے پر سابق ڈی آئی جی کو 3 سال قید اور ایک لاکھ جرمانہ
ملزم نے جب سے گھر پر قبضہ کیا ہوا تھا اس وقت سے 15 ہزار روپے ماہانہ کے حساب سے کرایہ بھی ادا کرے، عدالت
ایڈیشنل ڈسٹرکٹ اینڈ سیشن جج شرقی نے گلستان جوہر بلاک 7 میں 240 گز کے مکان پر غیر قانونی قبضے سے متعلق دعوے پر سابق ڈی آئی جی سائیں رکھیو کو 3 سال قید اور ایک لاکھ جرمانے کی سزا سنادی۔
کراچی سٹی کورٹ میں گلستان جوہر بلاک 7 میں 240 گز کے مکان پر غیر قانونی قبضے سے متعلق دعوے کا فیصلہ سناتے ہوئے سابق ڈی آئی جی سائیں رکھیو کو 3 سال قید کی سزا سنادی۔ عدالت نے ملزم پر ایک لاکھ روپے جرمانہ بھی عائد کردیا۔
عدالت نے حکم دیا کہ ملزم نے جب سے گھر پر قبضہ کیا ہوا تھا اس وقت سے 15 ہزار روپے ماہانہ کے حساب سے کرایہ ادا کرے۔ عدالت نے ملزم ساںق ڈی آئی جی ضمانت منسوخ کرتے ہوئے گرفتار کرنے کا حکم دے دیا۔
عدالت نے ایس ایچ او گلستان جوہر کو عدالتی احکامات پر عمل درآمد کا بھی حکم دے دیا۔ عدالت نے ایس ایچ او گلستان جوہر کو مکان کا قبضہ درخواست گزار کے دلوانے کی بھی ہدایت کردی۔
دعوے میں کہا گیا تھا کہ گلستان جوہر بلاک نمبر 7 میں 240 گز کا مکان اکتوبر 2016ء میں خریدا تھا۔ کچھ عرصے بعد پولیس اہل کاروں نے ڈی آئی جی سائیں رکھیو کے کہنے پر مکان کے تالے توڑ کر قبضہ کرلیا۔
ملزم کے وکیل نے کہا تھا کہ سائیں رکھیو میرانی نے مکان پر قبضہ نہیں کیا، سائیں رکھیو میرانی کے خلاف دعویٰ ناقابل سماعت ہے۔